Showing posts with label Tongkonan Kada Panito Bisara. Show all posts
Showing posts with label Tongkonan Kada Panito Bisara. Show all posts


GELONG MAWA'

Ta lambe-lambe pa mawa'
Ta  tambai pa masura'
Ta ongli pa doti langi'

Apa tangku kita oto'na
Tang ku perupa rupanna,
Tang kuissan garaganna....

Ba'tu pia untannunni
Baitti' ussauranni
Bongsu ummangkai lako,

Mawa' e.. Musalla ona',
Sele mudoko doko na',
Tang mu popentau ona'

Inang alukna nene'ki,
Sangka' turan todolo ki,
Bisara panglalananki,

Tang kapa' kapa’ diunu',
Tang bonde' dipeboloi,

Dipeangla' ten bintoen,
Ditiro ten ra'tuk langi'

Salebu' ade' diunu',
Gaun ade di peangla',

Unuran manna natendeng,
Sudi dipopaningoan,

Tang sumarombon lolinna,
Tang diembong pemunu'na,

Sumau ulliu tondok,
Samma’ lando salu sa'dan,

Ku kalle kallei aku,
Ku katumangngai aku,

Susi tonapa uki'na,
Susi pindan pembokoran,

Sali papan dao liu,
Nasurrukki ula' balu

Mareko reko api'na,
Kumanassak balidanna,
Memongan pa'kalaranna / (memongan tampa rapa’na),

Nataruntun susi kila',
Nakabe' susi galugu,
Natinti la'te mamara

Nasaile anna mangka,
Natiro anna maerun,

Samma’ maerun alukna,
Samma’ mangka bisaranna,

Na lulun sisama ampa'
Na palumpa' langngan ba'ba

Na pamatindoi sondong,
Na pamamma ri palanta'

Inda tu ampunna mawa',
Inda kapoenanna seleng,

Ma'dika ri randan langi',
Karaeng lelean uran,

Iari ampunna mawa,
Ia ri kapoenanna
Bara' tonang – tonanganna

Inda banua to dio,
Inda tondok to sambali'

Tondokna pesura' mawa'
Pa’ katadan doti langi’
Pa’ rekkok seleng sirenden,

Umpeto'do rara kila',
Tumantan lite deata

Ia nasurasan mawa'
Na tedakan lotong boko',

Na lekko lekkoi simuruk,
Na suangla' lawa lawa,

Naipa - ipa tang tarru',
Nasura' tangdilandi'
Narekkok tang siratuan

Tang siratuan sura'na,
Tang sidete' katadanna,
Lele ri mata manukna,

Ke na daun baului,
Ke nalentek dotilangi'

Untiro sampena bulan,
Tumanan baraninna
Ditallung kambaroanna,

Umpakande deatanna,
Untimbu' kapuanganna,
Naindo kapuran pangngan,

Manuk mabusa baba'na,
Nasumpak nasuan bo'bo'

Na lu'pi' lutama baka,
Na pa lan kampilo pirri',

Kamma' ke birroi allo,
Ke langnganni sulona padang,

Anna ke'de dio mai,
Na lao sambalin mai,

Dilembangan ade'mawa',
Dikoli - kolian ade'

Umpolalan bura - bura
Untonton liku mandalan,

Anna ke'de' menggantanan,
Dao kapadang padanganna,

Anak ma'dikai gowa,
Ampu lembang ri juppandang,

Iari ampunna mawa'
Kapoenanna lotong boko',
Bara' tonang - tonanganna,

Na lu'pi lutama baka,
Na pa lan kampolo pirri',

Na palele sangdatunna,
Na palengka' sangkaraengna,
Sang anak ampu lembangna,

Anak ma'dikai barru,
Karaeng ri pare pare,

Iari ampunna mawa',
Kapoenanna doti langi'
Bara' tonang – tonanganna ,

Nalu'pi'lutama baka,
Napalan kampolo pirri'

Napalele sangdatunna
Napalengka' sangkaraengna,
Sang anak ampulembangna,

Anak ma'dikai sossok,
Ampu lembang ri kalosi,

Ia ri ampunna maa'
Kapoenanna dotilangi'
Bara' tonang tonanganna,

Nalu'pi' lutama baka,
Napalan kampilo pirri',

Napalelei sangdatunna,
Napalengka'i sangkaraengna,
Sang anak ampulembangna

Anak ma'dikai tampo,
Ampu lembang ri mengkendek,
Karaeng to tiangka'na,

Ia ri ampunna mawa',
Kapoenanna dotilangi'
Bara' tonang tonanganna

Nalu'pi' lutama baka,
Na palan kampilo pirri'

Napalele sang datunna,
Napalengka'i sang karaengna,
Sang anak ampulembangna,

Penduan ponno mo tondok,
Penduan kapalinan omo la'bi,

Tae mo nasala mawa',
Nalenda lendai seleng,
Sanda mo ponnoan baka,

Ke denni lembang dialuk,
Tondok ditandi samaya,

Torro madatu ko mawa’,
Unnisung makaraengko

Ammu tontong dipobalo',
Unnesung tumbo kumuku'

Urria tallu lolona,
Sola a’pa’ taoninna

Sundunmo lolloanna mawa'
Siri-sirinna massura'
Gente'na seleng sirenden

(Marsel D. Lemang)
tongkonan kada panito bisara
Tarian Pitu lan tangngana Langi'


Bendanmi tarian pempitu lan tangngana langi’
Tunannangmi pandan dipamaroson lan una’na to paonganan
Siukkunan,
Ditalo Datu Bakka’ sola Pong Malaleong, tang na sanga
Sipakoko,
Ditalo Datu Bakka’ sola Pong Malaleong, tang na sanga
Dipato’doi uai,
Tang na sanga
Dipadioan bamba masingki’
Tang na sanga
Silondongan,
Ditalo, tang na sanga
Randukmi dipa’paran tekken to ditanan guling
Bendanmi tutungan dama’
Tunannangmi tendanan ma’lana-lana
Buntu sitarru’mi sulle to gandang
Gulingmi Tarasu I Langi’
Siparakusanmi allo melambi’ la kapararian
Di alami lan allo melambi’ tinaunna Datu Bakka’ sola Pong Malaleong
Di rintakmi lan kulla’ kamammuran
Na ballakmi Tarasu I Langi’ sanda salunna
Na sareseimi ta’pa malesona

..(publish: Marsel D. Lembang)
Tongkonan Kada Panito Bisara
SINGGI' Gelar Adat u/ Bapak Presiden & Ibu Ani ..
(disinggi' oleh Tominaa Ne' Sando Tato' Dena') ...

Bpk. Dr. H. SUSILO BAMBANG YUDHOYONO...
condorodi'.. condorodi'....
tiballa kiko ko tokko, tokka' gayang tarapang
kamma' toda tau, penduan kan ma' ko tau, pantallun tiparada'ko
siparapa'ko mairi', sikuanko sola nasang, allen pa' datu-datu ko
pia benni paningoan, da'na pareko-rekoan
la ussingi' ki' gayang ta, ta tendeng pa tarapang ta
inde gayang maelo ta, tarapang tapeangla'na, tobok talinde-linde na

mangka mo ki pilei langsa', ki tonno' bua kayu
to attu mangka di boko', kulla' pura di polendu'
anna passsambo langiran, na nenne' pasariongan
rampo ma' allo to temo, te kulla' ta tingayoi
anna dadi presiden lan negara Indonesia
tengka dadinna lan lino, tomai tampa rapa'na
ossoran tanda bu'tunna tang ki landi' la ki dete'
pangkun ki dende-dendean di pasayo-sayo singgi'
diumba' pa' turiangan, tanda mali'na nene'ta
Nenne' di poporandangan tontong la disiossoi'
nenne' disiturananni..
turiang na la ki lambi', ba'baran ki karatui
"turiang na gasing langi', bangkula' to palullungan, santung to lindo bulaan na lino"

silasamo na posugi', agi mo na polulangan
anna tang disirantean, te lan tangngana tondok

PANGIMBO PA" PASSAKKE
make' maka'doi singgi', makulassai' ba'baran tigena'i karombian
bubun datu lan te tondok
turunan lan te pangleon
bubun diampu lembangngi
ia ke'de' dipendio, lao dpembore-bore
anna masakke ara'ta, madarinding penaanta
masakke manglua' tiku, ta nenne' sitiro lindo
tontong simanta perupa, te lalaan kapadanganna
di kapayan payananna ..

IBU Hj. ANI BAMBANG YUDHOYONO
nakuanna' inde dodo', baine na sang todingan
dodo' nasang kalammaran
Make' ke ponnoi singgi', ke lempanni karombian
sape-sapeanna' sidi', alan na' sang salurekke
ku petape-tape dodo, ku palaan bomba bayungku
sumpak ku ke tiallena', ke ma'baa baanan na'
angku tang kapodo'-podo', unnulang tengko situru',
ke batakan siolanan

tang ta tiro raka tau, tang ta'pa raka matanta
pailo-pailo rupanna, passioan garaganna
pawarrang tampa rapa'na ussolai sangbara'na
unnarrang pada dadinna
sundun mo lollo' na dodo', siri'-siri' na baine
gente'na simbolong manik
anna tontong dipoindo', lan negara Indonesia ..

PANGIMBO PA'PASAKKE
Make' maka'doi singgi', makulassa'i ba'baran
tigena'i karombian
tang lumati' tang lumai, tobang lu rokko alla'ta
nairi' angin mambela, sola bara' pai'pinan
ta bangun masero pindan, nenne' mabase banawa
anta massakke mairi' marudinding sola nasang
tuo batang di kale ta ..


Merok Feast

Kurrean Sumanga' dalam pembukaan Massomba Tedong di Angin Angin, Kesu'

Kurre, kurre, kurre !!!

Kurre sumanga’na te padang tuo balo’, mangkamo na sampa’ rara’ nene’ mendeatanna te to ma’rapu tallang na bangunni banua
Saba’ parayanna te tana tumbo kulau’, napata bulaan todlo kapuanganna te to ma’kaponan ao’ umpate’dangngi a’riri sanda pati’na

Kurre sumanga’na te takinan pia
Saba’ parayanna te selleran lotong ulu

Kurre sumanga’na te oang mabilangan
Saba’ parayanna te pa’kombong to balanda

Kurre sumanga’na te banua di lindo puang, nanai bendan bongana gau’
Saba’ parayanna te sondong dirupa deata, la nanai tunannang samara bisara

Kurre sumanga’na te sarita to lamban
Saba’ parayanna te mawa’ to unnorong

Kurre sumanga’na te gayang ditarapangngi
Saba’ parayanna te kandaure salombe’

Kurre sumanga’na te tonapa londongna
Saba’ parayanna indo’ simangkoro

Dipandan bara’ dao banua unnarranni sang-eananna
Dipamamma’ doti langi’ dao tananan samba’ ungkorok sang-pa’duananna

Kurre sumanga’na te dedekan gandang
Saba’ parayanna te rembangan karongean

Kurre sumanga’na te sella’ mabusa baba’na
Saba’ parayanna te sa’pang mapute lente’na

Kurre sumanga’na te bai ma’bulu aluk
Saba’ parayanna te bonde’ massonggo bisara

Kurre sumanga’na te tedong ma’bulu aluk
Saba’ parayanna te karambau massonggo bisara

Kurre sumanga’na te sendana sugi’
Saba’ parayanna te kayu mentangke eanan

Kurre sumanga’na te bambalu toding
Saba’ parayanna te tualle lando samara

Kurre sumanga’na te tallu basongna
Saba’ parayanna te ue tallu lolona

Kurer sumanga’na te ma’bala tedong
Saba’ parayanna te ma’pangkung karambau

Kurre sumanga’na te bai makianakan
Saba’ parayanna te doko umpatale’ anakna

Kurre sumanga’na buyanna manuk
Saba’ parayanna kanuku diarru’

Kurre sumanga’na kaunan matutu
Saba’ parayanna ruranan papatu inawa

Kurre sumanga’na tallu bulinna
Saba’ parayanna tallu etengna

Kurre sumanga’na uma ma’kambuno lumu’
Saba’ parayanna panompok doke dokean

Kurre sumanga’na kalimbuang boba
Saba’ parayanna to’ mata uai

Kurre sumanga’na kalo’ titanan tallu
Saba’ parayanna palempang tallu ulunna

Kurre sumanga’na te tallang ma’lampa rara’
Saba’ parayanna te ao’ ma’buku bulawan

Kurre sumanga’na te serekan bane’
Saba’ parayanna te daun sumomba matallo

Kurre sumanga’na te alang dibando rara’
Saba’ parayanna te landa’ siayoka

Inanna tallu bulinna
Pa’tindoanna ke’te’ tallu etengna

La na ringki simbolong manik
La na ala lokkon loe rara’

Anna pe bu sarungngu’i panampa to bone
Na petirimba bu pangdenni pa’kombong to balanda

Na pe bu sarungngu’i to ma’puduk mundan
Na pe bu kayu aukki to ma’illong karumisik

Na randanni petawa mammi’ simbolong manik
Na biringngi lale’ sanda marasa lokko loe rara’

Kurre sumanga’na te baolu sitammu kayu ura’na
Saba’ parayanna te kalosi ponno issinna sola kapu’ ma’lumpa bumbungan

Kurre sumanga’na te tuak massari dadik
Saba’ parayanna te tagari sanguyun

Sundunmo ku kurre sumanga’ mintu’ la na papake surasan tallang
Upu’mo ku pole paraya rongka rongkana ra’bung di anggilo,
Na sielleran karidisan pandung balo

Apa denpi mani kusala kukurre sumanga’
Den pi mani kulenda kupole paraya

Apa umbai limbongmo nene’ bunga’ mellao langi’ inde barira banuanna to merrapu tallang
Umbai tasikmo todolo kapuanganna to mangnganna sangka’ inde rampe matampu’

La ku pa’buangngi sanda randanna, ke den kusala ku kurre sumanga’
La ku pa’kolakanni sanda biringna, ke den kulenda kupole paraya

Anna nene’ mangnganna sangka’ mo umpasirundunan buloi
Anna to dolo lentenan panikuan mo umpasitete malawa’i

Limbong dukamo puang matua lan rampe matallo la ku pa’buangngi sanda biringna
Tasikmo to kaubanan lan kabu’tuan kulla’, la ku pa’kolakki sanda randanna

Puang matua mo la umpasirundunan buloi
To kaubanan mo la umpasitete malawa’i

Tongkonan Kada Panito Bisara

Banuanna pa ku tendeng
Tondok na pa kulolloan,
Umba la susi tondokna
La si lio banuanna

Di kalungkung sora pindan
A'ririnna bendan rara'
Disulilang roroanna
Kayu auk suluranna
Pangden na po bala tedong
Kadinge' na posangkelo
Ayokana rande rara'
Kala'ka' disulu' ponto
Ampang pembassean mawa'
Pekkedengan doti langi'
Rayoanna lotong boko'
Sali limbong kalaunan
Kalada' batoran pare
Bendan tau manangngana
Susi saripi rindingna
Sambo rinding pai'pinan
Bara' pampang tau la'bi'
Manete pasareongan
Kaso bendan paimbobo
Tokeran bupala pessak
Tang pepori peporinna
Tang ue pepamarra'na
Tali bannu' peporinna
Langgesa' pepamarra'na
Darrak peba'na ba'nana
Sengo' papa illong tedong
Petolo' riti bulawan
Tindak sarira longana
Mian kila' pamiringna
Sundallak dambo dambona
Banua di papa mawa'
Ditarampakki masura'
Dibubungngi lotong boko'

(dipost: Marsel D. Lembang)
Tongkonan Kada Panito Bisara
Pare kamban dao langi'
pare ba'bana olinna

manda' natakia' lemba
na bantan tallu situru'

pare kua' pare pulu'
pare mandoti londongna
pare bantan bainena

susi balusu tu ara'na
susi gallang dalamena

dao patukunna puang
batoranna Totumampa

tang nalemba ke to kotdi'
ke to sanda' garaganna

pare sangsape dilullu'
anna sangbaka bannena
sangbingka' pentarukanna

diamboran tida masa'
disea' tinggi maro'

lolong minna' tu aka'na
ma'daun kanda lolo

susi to ta'bu dibummun
sarre dibatei oto'

susi sarita rundunna
ma'daun sarre mange'te'

pare tang na kande dena'
tang na karitto balao
tang na reke' serenanna

pare na tintingi aluk
narendenanni pemali

malapu' manna na issan
massi naan-naan...

Pare manoka ditanga'
tia' ladi kira-kira

iyapi anna mellao'
anna umbassei ampa'

lumiling pute amiri'
melluba'ba rangke tandu'

sundunmo lolloanna pare
siri-sirinna kinande
tempe'na tallu bulinna,,,

PIA_PIA_TORAYA
Tongkonan kada panito bisara
(Tabe' lako mimi' kandaurena to situang tanduk Ne' Lumbaa, siman lako lolosu manikna to sitonda sulangka dao mai Riu, Torea. Angku pa langnganni tongkonan kada inde kada disedan sarong, angku parekkei panito bisara inde bisara di toke' tambane baka)

Tasirere’-rere’ lendong
Tasi’pa’tallu masapi
Tasiimpa’ bale rante

Lendu’ tamamoko bassi
Kumande lannako liu
Ma’kasolang-solanganko

Tikalulunmoko bassi
Tilu’pi’moko mataran
Patondon patomaliko
Daomo’ tangkena gandang
mengurapakna tandilo
do ma’tondon penainna
Tondok boro toda dao
banua mapia toda
boro pangrantean toda
Kari’ la sa’timo dao
kari’ tang la sule lemmo
tang la balik bulo lemmo
Napopedampi to tumbang
napotamba’ to malangi’
burra to kandeatan

Nasule kale datunna
to kuli’ ampu lembangna
urruru tampa dolona
sola to simbulayanna
Anna burinti tumende
anna langkan boro tia’

Sulemo’ mendio’ gandang
membollo-bollo tandilo
melangi’ri suling bulo
Ta’pa passakkemo gandang
bua uranmo tandilo
Napopedampi to tumbang
napotamba’ to malangi’
burra to kandeatan

Sumonglo’ ma’ tanduk bassi
ma’ongka-ongka mataran
ma’patondon oda-oda
Oda-oda talaomo
sudidi tatiangka’mo
sumonglo’ rokkoko moko
Laoko sambalin mai
bu’tu lamban diong mai
Tibaen-baen kutiro
tipailang kusaile
sundallak kutiro lako
Make pabu’tumi mai
make popentolinomi
make baen-baenanmi
La nakita mamma’ku
nakadang tindo bongingku
sola mamma’ karuenku
Sumonglo’mo to Sesean
layomo to Lindo Tayu

Ke den to makuyu manuk
sola to makuyu langkan
Mai maimoko inde’
Dipopedampi rara’na
dipotamba’ kaisse’na
Make pabu’tumi mai
make baen-baenanmi
Ditadoi palakunna
diben lalan inaanna
Tungkalolong diara’na
lalan inayanna Puang
Pa’poraianna Deata
Tungka lolong diara’na
Napopedampi to tumbang
napotamba’ to malangi’
inde to kandeatan

Marsel D. Lembang
tongkonan kada panito bisara
Umba mira sangtondokna
To mai sangbanuanna

Ke’de’ko ta tannun bating
Ta balandung rio rio

Sae nasang to marintin
Mairi’ tangke tikunna

La marintin lako Ambe’
Mario lako ma’dadi

Ambe’ perangngimo’ mati’
Ambe’ tanding talingana’

La ku lolloan rara’ko
La ku tendeng bulawanko

La ku landi’mo dadimmu
Kudete’mo garaganmu

Daya sangtangkena langi’
Sangsumindungna batara
Sangsapa’ to Palullungan

Nanai longke dikombong
Tambu lebu’ didadian
Tumayang dikianakan

Randuk ke birromi allo
Ke dollokki sulo padang
Ke kapana’ panaranna

Langngan ditambuli gandang
Disu’bak pa’paredean

Anna dadi pole’ toding
Nakombong pole’ pangloli

Rokko ditambuli langi’
Dibuak pekali bassi


Dipantananni lolona
Diosok Rambo-rambona

Mampu’ sangsesena langi’
Na sarombon tauninna
Nabissik Rambo rambona

Tu nene’ mendeatanna
Todolo kapuanganna

Umbangunan lando longa
Unnosok salle a’riri

Dipatendanni patangdo’
Diosok lumbaa padang

Nanai longke ma’bua’
Tumayang ma’balinono
Linggi’ ma’kasea sea

Ma’kebua’ tang dilambi’
Menani tang didoloi
La’pa tang disirantean

Ta’bu sanglampa nasura’
Sangparaan na anggilo
Sangpati’ na sora pindan

Umbangunan ala’ ala’
Bendan susi anak dara

Dipepalangkai dao
Dipesondong bulawanni

Dibayu banggoi lako
Dibidakki pio bamban

Dilampa lampa darandang
Didandanni bung area

Mendolok api daona
Ra’rari tisea’ doing

Disanggingan pao makkan
Ambayang katarrananna

Na metamba rekke buntu
Meongli’ rekke tanete

Denka buntu tang na tendeng
Tanete tang na lolloan
Lombok tang nasiri siri

Anna turun sae baan
Anna lumalle bugiran

Tae’ dikita lumalle
Tang koyong passirukanna

Seba makkan diong to’na
Ia umpamangkai
Dipa’anak deatai

Tonna ke’de daya mai
Bu’tu lamban doing mai

Mellao disorong pindan
Ke’de’ dirande banaa

Nadoloan burakena
Naturu’ panglaananna

Dipasenggongngi garatung
Didedekki kuli’ saa
Rorengna tandilo ula’

Dao pangrantena Puang
Kala’paranna Deata
Kasipulu’-puluranna

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
To dolo kapuanganna

Tonna ke’de’ daya mai
Na lao sambalin mai

Karua gello na takin
Annan gayang di ayakna

Napa’petangkean uran
Na sembangan pini-pini

To dao to’ lemo laa’
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tonna ke’de’ daya mai
Na lao sambalin mai

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

To dao to’ tabang tua
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Bungka’ko ba’bana langi’
Pentiroanna deata

La na polalan ko bating
La na ola ko Mario

Kurapak allo nanai
Sumbang bulan na esungngi

Pa’tongkoanna nene’na
Esunganna to dolona

Lalan tang lalan na ola
Tang lemboan na po lalan


Lalan magengge magiang
Lalan ma’posanga-sanga

Tindak sarira na ola
Mian kila’ na polalan
Sundallak nap o lambanan

Sae mellesei Pongko’
Mentunannang ri Lebukan
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Na doloan burakena
Naturu’ panglaananna

Dipasenggongngi garatung
Didedekki kuli’ saa
Rorengna tandilo ula’

Sae mellesei Sepang
Mentunannang ri Karangan

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tiumba’ mo Bamba Puang
Dollok mo Pintu Deata

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

Sae mellesei Rura
Mentunannang ri Lellua
Pa’tongkoanna nene’na
Esunganna to dolona

Tonna ke’de’ lao’ mai
Na lao sambalin mai

Mellao disorong pindan
Ke’de’ dirande banaa


Sae mellesei Duri
Mentunannang ri Endekan

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

To nene’ mendeatanna
Todolo kapuanganna

Sae mellesei Se’ke’
Mentunannang ri Sinadi

Umbangunan lando longa
Unnosok salle a’riri

Nanai longke ma’bua’
Tumayang ma’balinono
Linggi’ ma’kasea-sea

Ma’kebua’ tang dilambi’
Menani tang didoloi
La’pa tang disirantean

Tonna ke’de’ lao’ mai
Na lao sambalin mai

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

Ma’tete batu mo bating
Unnola landa’ Sarira

Kasirimpunganna bating
Kakendenanna Mario

Umpalele tongkonanna
Umbe’do kapayunganna

Sae mellesei Kesu’
Mentunannang ri Bangkudu

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Sae mellesei Batu
Mentunannang ri Siguntu’

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Sae mellesei Singki’
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Na doloan burakena
Naturu’ panglaananna

Napasenggongngi garatung
Na dedekki kuli’ saa
Rorengna tandilo ula’
La rampo inde te tondok
Kenden inde te pangleon

Pa’tongkoanna nene’na
Esunganna to dolona

Dipatendanni patangdo
Diosok lumbaa padang

Nanai longke ma’bua’
Tumayang ma’balinono
Linggi’ ma’kasea-sea

Ma’kebua’ tang dilambi’
Menani tang didoloi
La’pa tang disirantean

Tu nene’ mendeatanna
Todolo kapuanganna

Sundun sangtangkena bating
Sangparaanna Mario

---000---

La ku lambi’mo dadinna
Kudete’mo garaganna

Ia ri tonna di kombong
Tonna dibassei bayu

Tang kembua rika langsa’
Tang tarri’ rika durian

Anna tang kanderi indo’
Anna tang onta-ontari

Bulawan pangidenanna
Rara’ elo’-eloranna

Dao bulan sangtampana
Bintoen sanggaraganna
Allo sangba’na-ba’nana

Pada didadian bulan
Pada kombong Bunga’ Lalan
Tonna randuk didadian
Tumayang dikianakan

Randuk ke birroi allo
Ke dellekki sulo padang
Ke kapana’-panaranna

Anna dadi pole’ toding
Na kombong pole’ pangloli

Langngan ditambuli gandang
Disu’bak pa’paredean


Rokko ditambuli padang
Dibuak pekali bassi

Dipantananni lolona
Diosok Rambo-rambona

Mendadi maa’ lolona
Kombong sarita uninna

Unnarre-arre ambe’na
Sumapuko ma’dadinna

Ganna’mi tallu bonginna
Ganna’ bilang-bilanganna

Mellao rokkomi alang
Diong landa’ beloanna

Diamparan omi ale
Dilante-lantean omi

Dilolloan anna lobo’
Ditende’ anna kasalle

Pada kasalle rundunna
Pada lobo’ beluakna

Randuk ke birromi allo
Ke kapana’-panaranna

Mellao lakomi bubun
To dio to’ pellangiran
Anna balik dio mai
Na pole sambalin mai

Nabaa rampo i tondok
Na pakenden ri pangleon

Pada kasalle indo’na
Pada lobo’ ma’dadinna

Kasalle nairi’ angin
Lobo’ nasimbo darinding

Anna kasalle madomi’
Na lobo’ tingkara-kara

Ma’doke-doke rangka’na
Ma’pasoan tarunona

Tu bulaan banne ba’tang
Tu rara’ rangga inaya
Ponto passasaran tuyu

Sanda sia malaenni
Sanda na benni deata
Sanda napatoeanni

To rongko’ patalo dio
Sitondon tindo bonginna
Sola mamma’ karoenna

Patarimako pala’mu
La na tibolloi sugi’
Na tikembongngi eanan

Anna ma’sumpu matua
Anna banu’ karurungan

Piran mi allu’na pasa’
Bilang-bilanganna tammuan
Anna lao ri ma’pasa’

Sule masaki ulunna
Madaramban beluakna



Dipalimbongmi to bara’
Sola anak to makaka

Ungkangkananni pesuru’
Sola to mangaku kumba’

Tu Ne’ Sara mi patalo
Sola to massarong kumba’

Anna matindoi sondong
Anna mamma’i banua

Matindo sisule pata’
Mamma’ sitandi banua
Untingara sengo’ papa

Ditambaimi Ne’ Sara
Sola to massarong kumba’

Urrundunanni alukna
Unteteanni bisara

To mamma’ lan lembang sura’na
To matindo lan lopi bulawanna

Siayo-ayo tombinna
Sidoloan banderana
Sola tombi to Luwu’na

Randuk ke birromi allo
Ke dollokki sulo padang

Mellao rokkomi alang
Doing landa’ beloanna

Susi passura’ to Bone
Pa’katadan to Balanda
Pangugi’ to tana Bugi’

Mellao rekke mi bamba
To daa to’ Sali-Sali

Nadoloanni Ne’ Sara (Ne’ Sara adalah nama orang)
Sola to massarong kumba


Sumonglo’ rante kalua’
Doing tandung sea-sea

Na doloan banderana
Naturu’ panglaananna
Sola tombi to Luwu’na

La natibolloi sarong
Na tikembongngi kambuno

Kambuno to randan langi’
Ta’dung to lelean uran

Unggaraga leppo-leppo
Sola to lempo bumarran

Nanai manta langsa’
Ussearan bua kayu

Sandami ka’panan balang
Sola usuk pinamile

Tae’mi ma’kada boko’
Tomai bati’ tikunna
Sola danga’ sariunna

Randuk untengkai kalo’
Ullamban pasala dua

Unnola tampo malolo
Randanan tang kelok-kelok

Anna ma’tendanan eran
Anna ma’bungkaran ba’ba

Anna ma’amparan ale
Anna pandanni allonan

Matindo sisura guntu’
Mamma’ sitandi takia’

Anna ma’tuturan ba’ba
Anna ma’sedanan sarong
Anna ma’bentangan eran


Anna balik dio mai
Na pole sambakin mai

Apa to? malemo sau’
Apa to? membuleanmo

Malemo naturu’ gaun
Naempa-empa salebu’

‘llambi’ tambuttana tallu
Sola pongko’ siannanan

Nanai torro ma’pangngan
Unnesung ma’lea-lea

Anna saile tondokna
Anna tiro banuanna

Make’ri tang tumangi’ko
Tang ma’paidu-iduko

Tumangi’ uran alloi
Si’dan pini-pini oi

Apa to? Malemo sau’
Apa to? Membuleanmo

Umpotedong-tedong batu
Ma’pasilaga lolanan

Nakua kada to Duri
Randan puduk to Endekan

Temmi to allo iongi’
Anna lendu’ daya mai
Anna messa’de banua

Ditambai tang mebali
Diongli’ tang sumu-sumu

Pala’ lentekna mebali
Kambutu’na meka io

Tinau’mo Bamba Puang
Leakmo Pintu Deata

Sangtongkonanmo nene’na
Sangesungan to dolona

Parannu-rannu nene’na
Sende-sende to dolona

Napa’parampoi sau’
Napa’baen-baenanni

Tibaen rokko matampu’
Diong kalambunan allo

Bendan kalukumo diong
La ma’induk tumayangmo

La lao langngan mo langi’
La dao to palullungan

Manda’ na takia’ Lemba’
Na salungku Bunga’ lalan
Na sipi’ mendila-dila

La ditiro ke mangambo’
Ke umparokkoki’ banne
Ke massea’-searanki’
Anna tang mesala pare

La sipassakkemo bating
La sibenmo’ tuo-tuo

Masakkeko kumasakke
Tabassing makole-kole

Mukeana kukeanak
Tabassing tumakin pia

Anakmu disanga Daeng
Anakku disanga Rippung

Anna daeng-daeng sugi’
Anna ripping bala tedong

Sundun sangtangkena bating
Sangparaanna Mario
---000---
Umba mira sangtondokna
To mai sangbanuanna

Ke’de’ko ta tannun bating
Ta balandung rio rio

Sae nasang to marintin
Mairi’ tangke tikunna

La marintin lako Ambe’
Mario lako ma’dadi

Ambe’ perangngimo’ mati’
Ambe’ tanding talingana’

La ku lolloan rara’ko
La ku tendeng bulawanko

La ku landi’mo dadimmu
Kudete’mo garaganmu

Daya sangtangkena langi’
Sangsumindungna batara
Sangsapa’ to Palullungan

Nanai longke dikombong
Tambu lebu’ didadian
Tumayang dikianakan

Randuk ke birromi allo
Ke dollokki sulo padang
Ke kapana’ panaranna

Langngan ditambuli gandang
Disu’bak pa’paredean

Anna dadi pole’ toding
Nakombong pole’ pangloli

Rokko ditambuli langi’
Dibuak pekali bassi


Dipantananni lolona
Diosok Rambo-rambona

Mampu’ sangsesena langi’
Na sarombon tauninna
Nabissik Rambo rambona

Tu nene’ mendeatanna
Todolo kapuanganna

Umbangunan lando longa
Unnosok salle a’riri

Dipatendanni patangdo’
Diosok lumbaa padang

Nanai longke ma’bua’
Tumayang ma’balinono
Linggi’ ma’kasea sea

Ma’kebua’ tang dilambi’
Menani tang didoloi
La’pa tang disirantean

Ta’bu sanglampa nasura’
Sangparaan na anggilo
Sangpati’ na sora pindan

Umbangunan ala’ ala’
Bendan susi anak dara

Dipepalangkai dao
Dipesondong bulawanni

Dibayu banggoi lako
Dibidakki pio bamban

Dilampa lampa darandang
Didandanni bung area

Mendolok api daona
Ra’rari tisea’ doing

Disanggingan pao makkan
Ambayang katarrananna

Na metamba rekke buntu
Meongli’ rekke tanete

Denka buntu tang na tendeng
Tanete tang na lolloan
Lombok tang nasiri siri

Anna turun sae baan
Anna lumalle bugiran

Tae’ dikita lumalle
Tang koyong passirukanna

Seba makkan diong to’na
Ia umpamangkai
Dipa’anak deatai

Tonna ke’de daya mai
Bu’tu lamban doing mai

Mellao disorong pindan
Ke’de’ dirande banaa

Nadoloan burakena
Naturu’ panglaananna

Dipasenggongngi garatung
Didedekki kuli’ saa
Rorengna tandilo ula’

Dao pangrantena Puang
Kala’paranna Deata
Kasipulu’-puluranna

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
To dolo kapuanganna

Tonna ke’de’ daya mai
Na lao sambalin mai

Karua gello na takin
Annan gayang di ayakna

Napa’petangkean uran
Na sembangan pini-pini

To dao to’ lemo laa’
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tonna ke’de’ daya mai
Na lao sambalin mai

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

To dao to’ tabang tua
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Bungka’ko ba’bana langi’
Pentiroanna deata

La na polalan ko bating
La na ola ko Mario

Kurapak allo nanai
Sumbang bulan na esungngi

Pa’tongkoanna nene’na
Esunganna to dolona

Lalan tang lalan na ola
Tang lemboan na po lalan


Lalan magengge magiang
Lalan ma’posanga-sanga

Tindak sarira na ola
Mian kila’ na polalan
Sundallak nap o lambanan

Sae mellesei Pongko’
Mentunannang ri Lebukan
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Na doloan burakena
Naturu’ panglaananna

Dipasenggongngi garatung
Didedekki kuli’ saa
Rorengna tandilo ula’

Sae mellesei Sepang
Mentunannang ri Karangan

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tiumba’ mo Bamba Puang
Dollok mo Pintu Deata

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

Sae mellesei Rura
Mentunannang ri Lellua
Pa’tongkoanna nene’na
Esunganna to dolona

Tonna ke’de’ lao’ mai
Na lao sambalin mai

Mellao disorong pindan
Ke’de’ dirande banaa


Sae mellesei Duri
Mentunannang ri Endekan

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

To nene’ mendeatanna
Todolo kapuanganna

Sae mellesei Se’ke’
Mentunannang ri Sinadi

Umbangunan lando longa
Unnosok salle a’riri

Nanai longke ma’bua’
Tumayang ma’balinono
Linggi’ ma’kasea-sea

Ma’kebua’ tang dilambi’
Menani tang didoloi
La’pa tang disirantean

Tonna ke’de’ lao’ mai
Na lao sambalin mai

Na doloan burakena
Naturu’ panglaananna

Na pasenggongngi garatung
Na dedekki kuli’ saa
Rorengna tandilo ula’

Ma’tete batu mo bating
Unnola landa’ Sarira

Kasirimpunganna bating
Kakendenanna Mario

Umpalele tongkonanna
Umbe’do kapayunganna

Sae mellesei Kesu’
Mentunannang ri Bangkudu

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Sae mellesei Batu
Mentunannang ri Siguntu’

Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Sae mellesei Singki’
Pa’tongkoanna nene’na
Esunganna to dolona

Umpalele tongkonanna
Umbe’do kapayunganna

Tu nene’ mendeatanna
Todolo kapuanganna

Na doloan burakena
Naturu’ panglaananna

Napasenggongngi garatung
Na dedekki kuli’ saa
Rorengna tandilo ula’
La rampo inde te tondok
Kenden inde te pangleon

Pa’tongkoanna nene’na
Esunganna to dolona

Dipatendanni patangdo
Diosok lumbaa padang

Nanai longke ma’bua’
Tumayang ma’balinono
Linggi’ ma’kasea-sea

Ma’kebua’ tang dilambi’
Menani tang didoloi
La’pa tang disirantean

Tu nene’ mendeatanna
Todolo kapuanganna

Sundun sangtangkena bating
Sangparaanna Mario

---000---

La ku lambi’mo dadinna
Kudete’mo garaganna

Ia ri tonna di kombong
Tonna dibassei bayu

Tang kembua rika langsa’
Tang tarri’ rika durian

Anna tang kanderi indo’
Anna tang onta-ontari

Bulawan pangidenanna
Rara’ elo’-eloranna

Dao bulan sangtampana
Bintoen sanggaraganna
Allo sangba’na-ba’nana

Pada didadian bulan
Pada kombong Bunga’ Lalan
Tonna randuk didadian
Tumayang dikianakan

Randuk ke birroi allo
Ke dellekki sulo padang
Ke kapana’-panaranna

Anna dadi pole’ toding
Na kombong pole’ pangloli

Langngan ditambuli gandang
Disu’bak pa’paredean


Rokko ditambuli padang
Dibuak pekali bassi

Dipantananni lolona
Diosok Rambo-rambona

Mendadi maa’ lolona
Kombong sarita uninna

Unnarre-arre ambe’na
Sumapuko ma’dadinna

Ganna’mi tallu bonginna
Ganna’ bilang-bilanganna

Mellao rokkomi alang
Diong landa’ beloanna

Diamparan omi ale
Dilante-lantean omi

Dilolloan anna lobo’
Ditende’ anna kasalle

Pada kasalle rundunna
Pada lobo’ beluakna

Randuk ke birromi allo
Ke kapana’-panaranna

Mellao lakomi bubun
To dio to’ pellangiran
Anna balik dio mai
Na pole sambalin mai

Nabaa rampo i tondok
Na pakenden ri pangleon

Pada kasalle indo’na
Pada lobo’ ma’dadinna

Kasalle nairi’ angin
Lobo’ nasimbo darinding

Anna kasalle madomi’
Na lobo’ tingkara-kara

Ma’doke-doke rangka’na
Ma’pasoan tarunona

Tu bulaan banne ba’tang
Tu rara’ rangga inaya
Ponto passasaran tuyu

Sanda sia malaenni
Sanda na benni deata
Sanda napatoeanni

To rongko’ patalo dio
Sitondon tindo bonginna
Sola mamma’ karoenna

Patarimako pala’mu
La na tibolloi sugi’
Na tikembongngi eanan

Anna ma’sumpu matua
Anna banu’ karurungan

Piran mi allu’na pasa’
Bilang-bilanganna tammuan
Anna lao ri ma’pasa’

Sule masaki ulunna
Madaramban beluakna



Dipalimbongmi to bara’
Sola anak to makaka

Ungkangkananni pesuru’
Sola to mangaku kumba’

Tu Ne’ Sara mi patalo
Sola to massarong kumba’

Anna matindoi sondong
Anna mamma’i banua

Matindo sisule pata’
Mamma’ sitandi banua
Untingara sengo’ papa

Ditambaimi Ne’ Sara
Sola to massarong kumba’

Urrundunanni alukna
Unteteanni bisara

To mamma’ lan lembang sura’na
To matindo lan lopi bulawanna

Siayo-ayo tombinna
Sidoloan banderana
Sola tombi to Luwu’na

Randuk ke birromi allo
Ke dollokki sulo padang

Mellao rokkomi alang
Doing landa’ beloanna

Susi passura’ to Bone
Pa’katadan to Balanda
Pangugi’ to tana Bugi’

Mellao rekke mi bamba
To daa to’ Sali-Sali

Nadoloanni Ne’ Sara (Ne’ Sara adalah nama orang)
Sola to massarong kumba


Sumonglo’ rante kalua’
Doing tandung sea-sea

Na doloan banderana
Naturu’ panglaananna
Sola tombi to Luwu’na

La natibolloi sarong
Na tikembongngi kambuno

Kambuno to randan langi’
Ta’dung to lelean uran

Unggaraga leppo-leppo
Sola to lempo bumarran

Nanai manta langsa’
Ussearan bua kayu

Sandami ka’panan balang
Sola usuk pinamile

Tae’mi ma’kada boko’
Tomai bati’ tikunna
Sola danga’ sariunna

Randuk untengkai kalo’
Ullamban pasala dua

Unnola tampo malolo
Randanan tang kelok-kelok

Anna ma’tendanan eran
Anna ma’bungkaran ba’ba

Anna ma’amparan ale
Anna pandanni allonan

Matindo sisura guntu’
Mamma’ sitandi takia’

Anna ma’tuturan ba’ba
Anna ma’sedanan sarong
Anna ma’bentangan eran


Anna balik dio mai
Na pole sambakin mai

Apa to? malemo sau’
Apa to? membuleanmo

Malemo naturu’ gaun
Naempa-empa salebu’

‘llambi’ tambuttana tallu
Sola pongko’ siannanan

Nanai torro ma’pangngan
Unnesung ma’lea-lea

Anna saile tondokna
Anna tiro banuanna

Make’ri tang tumangi’ko
Tang ma’paidu-iduko

Tumangi’ uran alloi
Si’dan pini-pini oi

Apa to? Malemo sau’
Apa to? Membuleanmo

Umpotedong-tedong batu
Ma’pasilaga lolanan

Nakua kada to Duri
Randan puduk to Endekan

Temmi to allo iongi’
Anna lendu’ daya mai
Anna messa’de banua

Ditambai tang mebali
Diongli’ tang sumu-sumu

Pala’ lentekna mebali
Kambutu’na meka io

Tinau’mo Bamba Puang
Leakmo Pintu Deata

Sangtongkonanmo nene’na
Sangesungan to dolona

Parannu-rannu nene’na
Sende-sende to dolona

Napa’parampoi sau’
Napa’baen-baenanni

Tibaen rokko matampu’
Diong kalambunan allo

Bendan kalukumo diong
La ma’induk tumayangmo

La lao langngan mo langi’
La dao to palullungan

Manda’ na takia’ Lemba’
Na salungku Bunga’ lalan
Na sipi’ mendila-dila

La ditiro ke mangambo’
Ke umparokkoki’ banne
Ke massea’-searanki’
Anna tang mesala pare

La sipassakkemo bating
La sibenmo’ tuo-tuo

Masakkeko kumasakke
Tabassing makole-kole

Mukeana kukeanak
Tabassing tumakin pia

Anakmu disanga Daeng
Anakku disanga Rippung

Anna daeng-daeng sugi’
Anna ripping bala tedong

Sundun sangtangkena bating
Sangparaanna Mario

Marsel D. Lembang
(tongkonan kada panito bisara
Ossoran Badong Rapasan - Langda (To’ Bua’)

Unnola ba’bana langi’
Pentiroanna deata
Pintunna to palullungan

Bu’tu tibaen todingna
Ti pailan samaranna

Lalan tang lalan na ola
Tang limbuan na limbui

Tindak sarira na ola
Sundallak na po lambanan
Borrong na tete lumingka

Sae mellesei Pongko’
Kalebu’ natirandukki

Umbangunan lando longa
Unnosok sale a’riri

Umpalele tongkonanna
Umbe’do sussareanna
Tongkonan kapayunganna

Sae mellesei Rura
Malino na tirandukki

Umbangunan lando longa
Unnosok sale a’riri

Disuriang roroanna
Ditallung kambaroanna

Kala’ka’ tandi eanan
Gayang gumello pata’na

Rinding tibangko lola’na
Petuo lellua langngan

Bara’na bulian la’bi
Pampang para dolo borrong

Sumu’duk ma’lana lana
Kaso mani dao mai

 Tindak sarira randanna
Mian kila’ pamiringna

Sundallak rampanan papa
Passengoran illong tedong

Kiding kiding tarampakna
Papana roto bintoen

Lotong boko’ bubunganna
Darrak mangimba longana

Bendan lawang lawang sugi’
Ke’de’ patangdo’ bulawan

Natalimbung kulu kulu
Na apun arre barani
Sola sapuko londongna

Ke’de’ na dodoi pusuk
Na parembonan pelole’

Na dedekki kuli’ sawa
Rorengna tandilo ula’

Natibulantei ra’tuk
Natikembongngi mariri
Lindang barra’ sayoanna

Disanga alukna bua’
Bisaranna balinono

Ma’kebua’ tang dilambi’
Menani tang didoloi
La’pa tang disirantean

Sundunmo alukna bua’
Bisaranna balinono

Tipalele pessaratu’
Tibe’do pemmanang pulo

Sae mellesei Batu
Marinding na tirandukki

 Pa’tongkoanna nene’na
Nang inan kapayunganna

Nanai sumio’ aluk
Untawa timba bisara
Ussassang tallu kalo’na

Tipalele susuk omo
Tibe’do katonan omo

Tipalele pessaratu’
Tibe’do pemmanangpulo

Nadoloan burakena
Naturu’ panglaananna
Bengsu sanda saratu’na

Na pasenggongngi garatung
Na dedekki kuli’ sawa
Rorengna tandilo ula’

Na tibulantei ra’tuk
Na tikembongngi mariri
Lindang barra’ sayoanna

Nadoloan burakena
Naturu’ panglaananna
Bengsu sanda saratu’na

Sae mellesei Kesu’
Bangkudu na tirandukki

Umbangunan lando longa
Unnosok salle a’riri

Pa’tongkoanna nene’na
Nang inan kapayunganna

Sae mellesei Tampak
Nonongan na tirandukki

Umbangunan lando longa
Unnosok salle a’riri

Bendan lawang lawang sugi’
Bendan patangdo’ bulawan



Natalimbung kulu kulu
Na apun arre barani
Sola sapuko londongna

Disanga alukna bua’
Bisaranna balinono

Na tibulantei ra’tuk
Na tikembongngi mariri
Lindang barra’ sayoanna

Na dedekki kuli’ sawa
Rorengna tandilo ula’
Na pasenggongngi garatung

Sundunmo alukna bua’
Bisaranna balinono

Umpalele tongkonanna
Umbe’do sissareanna

Na palele pessaratu’
Nabe’do pemmanang pulo

Sae mellesei Pongko’
To’ Lengke’ na tirandukki

La rampo inde te tondok
Inde te sa’de banua

Tau manoka ditambuk
Mengkailing dibannean
Moka dibassei dodo

To dadi dao pussakna
Kombong lan matalabona

Apa na kande indo’na
Apa na kasuallai

Tang ambayang tang dadeko
Tang pao tang elu elu

Bulawan pangidenanna
Rara’ elo’ eloranna

Anna kombong pole tau
Na rende pole to lino

Na landi’ kanna bonginna
Sola bilang bilanganna

Untambai kaunanna
Dua’ maleke lekena

Na sumurruk tama kombong
To layan pantanan nene’

La ussembang ao’ gali
To bane’ situang bombing
Anna ti’pa’ daun induk

Na bawa lako barira
To dio tetuk banua
Umpoliling kalumbassik

Na pao’tonni pangnganna
Dipandan lantona puduk
Sola to ta’bano lentek

Na tangkean piso rongko’
To bayak batu lapparan

Na pealla’ tu usukna
Na ola pangruanganna

Na di killang tarutunna
Dibungka’ sanda ilanna

Limbong tongan mo pa’dunna
Bannang kandunmo ura’na

Tuo lampa’mo buana
Mengkepakmo tu bayana

Ulangna takinan pia
To semberan lotong ulu

Na pantiti’mo mammi’na
Na sadi’ mo marasanna

Na pantitiran to dolo
Na sadiran to matua

Randuk na patama suke
Tallang ma’buku bulawan


Na manasu na malinge’
Randuk na serekan bane’

Na pa sisola belundak
Anna kaledo sirapi’
Sola to babona bo’bo’

Na dandanan lako nene’
Na bato’ lako to dolo

Na masiang dio mai
Na kulla’ birro te allo

Untambai kaunanna
Dua’ maleke lekena

Na sumurruk tama kombong
To layan pantanan nene’

La ussembang ao’ gading
Tallang ma’buku bulawan

Na tibalik layan mai
Na sule sambali’ mai
Umpo babu’ duri banga

Na pa langnga banuanna
Umpoliling kalumbassik

Umpandan lantona puduk
‘nnampa’ bane’ situang bombong

Na kangkanan bassi rongko’
To bayak batu lapparan

Na pealla’i usukna
Na ola pangruanganna

Saba’ tonganmo rarana
La saba’ te pangrianna
Lellua pantaranakna

Na bungka’i to dadanna
Na killangngi tarutunna

Pangso tonganmo pa’dunna
Tuo lampo’ to buana
Bendan patuku ma’dandan

Ulangna mendaun sugi’
Sola tuma’bi eanan

Na tunu pole mi api
Na tolla ma’lana lana

Na manasu na malinge’
Na pantitiran Deata
Na sadiran To Menampa

Randuk na patama suke
Tallang ma’buku bulawan

Na manasu na malinge’
Na serekan pole’ bane’

Na dandanan lako Puang
Na bato’ lako Deata

Na pantitiran mammi’na
Na sadiran marasanna

Na doloan paesungna
Sola to pangurrandena

Dikombai pole bannang
Dibeke’ pole mariri

Sundunmo alukna tau
Te bisaranna to lino

Kasalle pole madomi’
Na lobo’ tikara kara

Na randan matua induk
Sola te mando karurung

Masaki saki ulunna
Maroramban beluakna

Kuan nasang mi to bara’
Mintu’na kambuno lele

Na toeanni pesalu
Pessalossok ulelean

Tang lakomi te pesalu
Tang tongan te pessalossok

Tu patalomi nene’na
Ma’budamo todolona

Male tibangko lentekna
Tirimbak pessoyananna

La dipatumba ri lako
La di duang diapa ri

Ke patalo mi Puangta
Ma’buda To Tumampata

Nakua kada to Duri
Sumbang puduk to Endekan

Tonna lendu’ daya mai
Mentangnga sa’de banua

Ditadoi lako pangngan
Diben kalosi unniling

Anna lendu’ pole sau’
Lao’ rumombena langi’

Lao’ tumangkena gaun
Umpuranganna salebu’

Nanai torro ma’pangngan
Unnesung ma’lea lea

Kuli’ kalosi pasondok
Limbong berak na orongngi

Lao’ tambuttana tallu
Lao’ pongko’ siannanan

Lamban lian peambongan
Sambali’ petanantian

Umpotedong tedong batu
Umpokarambau tempe’

Anna lendu’ pole’ sau’
Tang na lambi’tama mata
Dikolak pentiro sau’

Sangtongkonan mo nene’na
Sangesungan to dolona

Bendan kaluku mo lao’
Tuo induk tumayangmo

Tibaen rokko matampu’
Songka rokko kalambunan

La lao langngan mo langi’
La dao to palullungan

Dadi Deata mo dao
La kombong to palullungan

Manda’ na takia’ Lemba’
Na salungku Bunga’ Lalan
Na apun mengkidi kidi

La di tiro ke mangambo’
Ke umparokko ki’ banne
Ke massea’ searanki’

Masakke ko ki masakke
Anta pada marudinding
Kianak ko ki kianak

Anakmu disanga Daeng
Anna daeng daeng sugi’

Annakki disanga Reppung
Anna reppung bala tedong

Pakianakko to belang
Angki ma’sompo ma’kepak
Ma’takia’ patomali

Copas Marsel D. Lembang
Tongkonan Kada Panito Bisara
Sampa'na to bendan untulak buntunna bone, ullangda' to sendana bonga
e... rangnganni ke la'bi, pakaloloi ke tonganni
  • Pong Kalua’ (R.Batu) -->To bendan pakorok londong, Ilan lili’na lepongan bulan,Tonna ditulak buntunna bone, Tonna dilangda’ to sendana bonga
  • Pong Songgo (Limbu) : To bendan paloloan, To tunannang pembala’baran (Atau) To tunannang meosik tanda saungan, Ilan tikunna matari’ allo, tonna dilutu Tombang lepongan bulan. Diossa’ balatana tikunna matari’ allo
  • Ne’ Sanda Kada (Limbu) : to bendan matimpolok maa’, To tunannang ma’tetuk doti langi’, Tonna diindo’ kapuran pangngan
  • Ne’ Tikuali (Ba’tan) : to unnindo’ kapuran pangngan, To unnambe’ pelambaran bolu, Tonna bendan basse sangsorongan pindan, Tonna tunannang panda sanglentenan tallo’
  • Tumbang datu (Bokko) : To unnimbo karokayu nangka’
  • Palinggi’ (Labo’) : To unnambe’ pesangle lebani’, To umbangunan biang ra'ba Untulak tille malulun, Palinggi' tungka sanganna.
  • Patabang Bunga’ (Tadongkon) : To unnumbu’ pasoan bangi’
  • Sanggalangi’ (Pantilang) : To umparra pangulu makati’
  • Kadere’ (Duri) : To undasi’ pokana lembang, To umpasilasuk le’tona komba bulaan
  • Amang (Ramanden) : to untangla’ lemba’ le’to, To unnumpu’ pearra’ ka’tu
  • Amba bunga’ (Makale) : To diposulle gayangna tanduk tata’, Todiposolon tarapangna takia’ bassi
  • Ne’ Malo’ (Tondon) : To turun sangbala tedong, Mellao sangpangkung karambau
  • Mendila Kila’ (Rongkong) : To ungkambi’ passaparan padang To untaranak katonan matakali dao tondon garopokna lepongan bulan
  • Gandang Langi’ (Mamasa) : To siria katonan padang bendan pekorok londong diong matampu’na lepongan bulan
  • Arrang Bulaan (Rantebala) : To umpenandai mata kali, Dio rampe matallona lepongan bulan
  • Pakabatunna (Sesean) : To maluang sambu’ batu ba’tengna, Unnimbo kapuran pangan, Tonna dipabendan bala’kaan ra’
  • Kulukulu’ Langi (Palipu’) : to umpabendan suke dibonga, To umpatunannang songkang Dianggilo’ tonna diindo’ Basse sangsorongan pindan
  • Mendila Lalong (Sa’dan) : To maluang sambu’ batu batangna, To masinggung karangan pasiruanna, To untaranak kalimbuang boba, Umpanundu’ panambu tang ma’ti
  • Bara’ padang (gandang batu) : To ma’bulo sanglampa, Rokko basse kasalle, Ma’ao’ tangkelesoan rokko panda dipamaroson
  • Pong Arroan (Sillanan) : To ma’bulo sanglampa, Rokko basse kasalle, Ma’ao’ tangkelesoan rokko panda dipamaroson
  • Pong Dian / Tinoring : To ma’bulo sanglampa, Rokko basse kasalle, Ma’ao’ tangkelesoan rokko panda dipamaroson
  • Pong Barani / Marinding : Todi parande duanna basse adinna
  • Tobo’ / Tampo : Todi po bara’ baraninna basse adinna
  • Pong Turo / Baturondon : To ma’bulo sanglampa rokko basse kasalle
  • Puang Balu / Tangti : Balo’ mangarranna tananan dama’
  • Pula’ / Tengan : Toma’ bulo sanglampa, toma’ ao’ tangkelesoan untulak basse kasalle
  • Sarangnga’ / Lemo Mengkendek : Toma’ bulo sanglampa, toma’ ao’ tangkelesoan untulak basse kasalle
  • Tanduk Pirri’ / Ala’ : Todipolondong saunganna kadatuan
  • Arring / Mandetek ; To umpabendan to sisulu basse, umpatunannang to sisolon sisariri, tonna ditulak buntunna Bone
  • Lunte / Mariali : Toma’ bulo sanglampa, toma’ ao’ tangkelesoan untulak basse kasalle
  • Rere’ / Lion : Toma’ bulo sanglampa, toma’ ao’ tangkelesoan untulak basse kasalle
  • Baan Langi’ / lapandan : Toma’ bulo sanglampa, toma’ ao’ tangkelesoan untulak basse kasalle
  • Saarongre / Tondok Iring : Toma’ bulo sanglampa, toma’ ao’ tangkelesoan untulak basse kasalle
  • Marimbun / Bungin : Toma’ bulo sanglampa, toma’ ao’ tangkelesoan untulak basse kasalle
  • Panggeso / Tiromanda : sda
  • Sando Pasiu’ / Pasang : sda
  • To Landa’ / Santung : to ma’bulo lollong, to ma’ tallang tang ke lesoan, untulak basse kasalle
  • Bangke Barani / Manggau : sda
  • Parondonan / Ariang : sda
  • Sundallak / Burake : sda
  • Panggalo / Lemo Pa'buaran : sda
  • Sa’bu’ Lompo / Bonoran : to umpamarongka basse kasalle
  • Pirade / Tonga : to umpamarongka basse kasalle
  • Patasik / pao : to umpamarongka basse kasalle
  • Poppata’ / Nanggala sda
  • Patora Langi’ / Langda sda
  • Ne’ Patana’ / Kanuruan sda
  • Patana' / Tambunan
  • Bannelangi’ / Kadundung sda
  • Tibak Langi’ / Saloso sda
  • Ne’ Kalelean / Rorre sda
  • Banggai / Salusopai : to ussuru’ kanan kairinna pokki’, ussara’ka’ tingayo boko’na tang mendelo2
  • Pokkodo / Tagari Sa’dan : to sangbasse nene’ta, to sangkapala panda kapuanganta, untulak buntunna Bone
  • Palotongan / Malakiri : sda
  • Pangarungan / Tallung lipu : Pande paliukna bala’kaan ra’, kaissananna tananan dama’
  • Taruk Allo / T.lipu : sda
  • Tengko Asik / Barana’ sda
  • Pong Padondan / Tikala sda
  • Lotong Tara / Bori’ sda
  • Allopaa / Kayurame sda
  • Bangkele Kila’ / Akung : todi sakka pa’taunanna, untandai allo rongko’ dipabendanni tananan dama’, unnissan lingkana bulan, untuntun pa’taunan
  • Ne’ Darre / Makki : to la pakorok londong dio passapan padang, umpenandai mata kali
  • Ne’ Mese’ / Baruppu’ : to umpenandai pangala’ tamman, to umpanundu’ kurra manapa’, unnala ipo lite, kayu tang dampianna
  • Sarungngu’ / Pangala’ : to manoka di tiro rokko, unniling dimanta lusolo’ lako to palutu tombang, to paossa’ balatana
  • Banggai Napo / Napo : To untulak tengko situru’, ullangda’ batakan siolanan
  • Usuk Sangbamban / To’ Tallang : sda
  • Ambe’ Bando’ / Awan : sda
  • Ledong / Bittuang : sda
  • Pong Rammang / Piongan : sda
  • Tandirilambun / Tapparan : sda
  • Batotoi Langi’ / Saa’ Tandung : sda
  • Tandirerung / Ulusalu : Kurungan kalle-kalleanna padang di Pattan, tangkoan la’te lambunna Ma’dika Matasak
  • Pong Manapa’ / Se’seng : to membatu ate pokki’na, metaronggo malia’ pai’ tang mendelo2na
  • Pappang / Palesan : to ma’ bulo sanglampa rokko kada situru’, ma’ ao’ tang kelesoan rokko bisara misa’ bunganna
  • Batara Bau / Bau : sda
  • Pong Bakkula’ / Redak : sda
  • Tangdierong / Baroko sda
  • To Layuk / Simbuang sda
  • To Kondo’ / Buakayu sda
  • Banggai Rano / Balepe’ sda
  • Patittingan / Talion sda
  • Sodang / Buakayu to umpamatua induk basse kasalle
  • Lapatau / Tombang sda
  • Sege’ / endekan to unnia’ tanete lumembang, to ussuka’ sukaranni bottona palo2
  • Poni Padang / Simbuang to pakorok londongna matampu’, meosik tanda saunganna kalambunan
  • Balluku’ / Mamasa sda
  • Karrang Bulaan / mamasa : sda
  • Paressean / Karre : to di porinding penaanna rampe matallo, dipopekulambu ba’tengna to kakendekan kulla’
  • Sangga Matua / Bokin : to sangbasse nene’ diponene’, sangkada panda to dolo kapuanganta
  • Pagunturan / Bebo’ : to dipotalinga rara’na bala’kaan ra’, dipomata bulaanna tananan dama’
  • Ne’ Lello / Leatung : to untoe manda’ basse, umpatulangdanni panda dipamaroson
  • Lando Aak / Boto’ : todi lando lalanni tonna di tanan pasa’ bongi, todilangka pa’taunanni tonna dipatunannang tammuan di pamalillin
  • Batara Langi’ / Boto’ : sda
  • Kondo patalo / Lampio : to ma’ bulo sanglampa rokko basse kasalle dst
  • Pagonggang / Batualu : sda
  • Patobok / Tokesan : sda
  • Tomorere’ / Gantaran : sda
  • To Gandang / Sarapung : sda
  • Salle Karurung / Paniki Buntao’ : to urra’ta’ balayan sialikna, to untina’ tualle samaranna
  • Barumbun / Buntao’ : to unnindo’ lumbangan, to unnambe’ pa’panannangan
  • Takia’ Bassi / Angin2 : to dipolondong kila’na bala’kaan ra’, dipotangkoan la’te lambunna tananan dama’
  • Songgi Patalo / Lemo, Tallung Penanian Sarira : to dipotanduk tata’na pa’ealian
  • Karasiak / Madandan : to umpabendan suke di bonga tonna dipamatua induk basse kasalle, to umpatunannang songkang di anggilo tonna dipabanu’ karurungan panda dipamaroson
  • To Kalu’ / endekan : to unnia’ ulu buntunna bone, to ussuka’ palo2 to sendana bongi
 Marsel D. Lembang & Yohanis Bulan Lobo
Ia ade’ tona Sali papan ia tau lan lili’na Lepongan Bulan,
marante banua ia lan tikunna Matari’ Allo.

Tang sipakundunan ia bukunna loli,
tang sipakalubamban ia tangke pamuso’.

Apa ma’lalong-lalong ia Pakila’ Allo lanmai Randan Batu,
ma’panggalo’-galo’ ia Ambe’na Bu’tubulaan lanmai Batu Karambau.

Lu rekke lu sau’mi untengko lullu’ aluk dipatuo balo’ lan lili’na Lepongan Bulan,
lu lako lu lanmai ussenggong balatana sangka’ kalena to tang ditulak mata buntunna,

ungente’mi tondon to batangna to tang dibalado tondon tanetena lan tikunna Matari’ Allo.
Unggaragami liku illan padang di Bokko’,
ungkondomi limbong ilan ulunna padang di Sangalla’.

Nasakkaimi buaya,
la nanai umpasombo bunganna katongananna lan lili’na Lepongan Bulan,
la nanii umpapayan peampunna kakuasanna lan tikunna Matari’ Allo.

Ma’kada deatami Pakila’ Allo,
sumu Puangmi Ambe’na Bu’tu Bulaan, nakua:
”Iatu la mendadi kande mammi’na te buaya kasayanganku,
iatu la mendadi timbu’ marasanna te bendo’ kamoyaku,
tangia olo’-olo’ lan kapadanganna,
tangia manuk-manuk di langi’,
tangia olo’-olo’ bu’tu ri uai,
sangadinna ia tu pia’-pia’ bunga’ urrubak pa’tambukanna indo’na,
anak pa’bunga’ tungka sanganna.

Rumondo madinginmi lan lili’na Lepongan Bulan,
ma’pu’ mapallanganmi la tikunna Matari’ Allo.

Ditoean mi tengko situru’ la ungka’tu angina di pudukna Pakila’ Allo,
Dikangkanan mi batakan siolanan la unronta’ tondon to batangna Ambe’na Bu’tu Bulaan.

Dipasananmi ipo rekke Baruppu’
la dipake la untina’ bamba kollongna Pakila’ Allo,
la untepok passaronganna Ambe’na Bu’tu Bulaan.

Allo siappa’na Pakila Allo nalandi’ makuyu langkan,
kulla’ kasidollokanna Ambe’na Bu’tu Bulaan nadete’ marammu manuk-manuk.

Dikutu’imi kada tu anak daranna la ungka’tu angin di pudukna Pakila’ Allo,
dibokongimi pepasan polo kaindi’na la unrronta’ bannang penaanna Ambe’na Bu’tu Bulaan.

Maringanmi batu ba’tangna anak daranna,
telang lolimi karangan pasiruanna polo kaindi’na

anna patiangka’ bate lentekna lako bangunan banuanna Pakila’ Allo
anna patirimbak passoeanna lako todollo ata’na Ambe’na Bu’tu Bulaan.

Tonna rampomo ma’tumangi’-mangi’ tu anak daranna
si indo’mi ma’biung-biung te polo-kaindi’na.

Naraka’mi tu Pakila’ Allo, nalukai kanukunna sidi’ tu batu kidena nasussui ipo.
Ka’tumi angin di pudukna Pakila’ Allo,
ronta’mi bannang penaanna Ambe’na Bu’tu Bulaan.

Ka’tumi umpenallon sikunna
ronta’mi umpennampa’ talinganna.

Paya ta’nakmi tau lan lili’na Lepongan Bulan,
ma’ganda pantananmi la tikunna Matari’ Allo.

Umpatiangka’mi bate lentekna Bu’tu Bulaan male ussedan sarongna langan padang di Bone umpatirimbami pessoeanna bungsu pepayunna male untoke’ dallo riona langan to sendana bonga.

Umpatiangka’mi bate lentekna Aru Pute sola sambo boko’na dio padang di Bone.
Umpatirimbami pessoenna Ra’ria Manda’ dio mai to Sendana Bonga si panglola rinding tingayona.

Susi tanete lumembang,
pangala’ ma’palumingka

umpolalan bamba puang,
unnola pintu deata,

dibilang, disuka’ sukaranna ganna’ pempitu palo-palo.

Tonna lambi’mo padang di Malua’,
tonna se’ponmo Tallu Batu Papan

diborong tallu mi Buntunna Bone,
dipannola matampu’mi penduan palo-palo;
dipennola matallo penduan palo-palo,
dipennola tangngami padang pentallun palo-palo.

Ma’urang sumassangmi Buntunna Bone tama Lepongan Bulan
ma’bumbu’ sidoloanmi to Sendana Bonga tama Matari’ Allo.

Rampo mi ussanggang lili’na Lepongan Bulan,
tu’tunmi ussangka’ tikunna Matari’ Allo.

Ma’lalong-lalong mi lan lili’na Lepongan Bulan,
ma’panggalo’-galo’mi lan tikunna Matari’ Allo.

Dilutu tombangmi bubun dirangkang,
diossak balatananmi panambu bulaan.

Diteka’mi bua layuk,
dikala’pami kaluku undara,
di embe’mi induk saang bunga’.

Apa maluangan sambu’ ia batu ba’tengna Pong Songgoi Limbu,
apa mabomba luangan ia karangan pasiruanna Ne’Sanda Kada.

Umpatuka’mi pa’inaan la untulak Buntunna Bone,
umpasolo’mi Pa’ba’tengan la ullangda to Sendana Bonga.

Untananmi pasa’ bongi la padang di Sarira
umpabendanmi tammuan dipamalillin lan di Pata’ Padang.

Dilandolalanni Pong Kalua’ rekke Randan Batu
dilangka pa’taunanmi Karasiak langan Madandan;
anna Topa’pak lan Mengkendek,
Landoaak lan Boto’na Batara Langi, Ambabunga’ lan di Makale.

Unnissung ma’kada situru’mi lan kombongan kalua’,
unno’ko’ misa’ bungannami lan tinimbu malambe’,
anna bendan To Pada Tindo.

Dipasanmi to dipolondongna kada lanmai lili’na Lepongan Bulan
ditambaimi ti dipomanuk muanena pangumpuran pau-pau lanmai tikunna Matari’ Allo:
1. Pong Kalua’ di randan Batu
2. Pong Songgoi Limbu lan di Limbu
3. Karasiak lan di Madandan
4. Landoaak na Batara Langi’ lan di Boto’
5. Ambabunga’ lan di Makale
6. Pong Boro lan di Maruang
7. Tumbang Datu lan di Bokko
8. Patobok lan di Tokesan
9. Kondo Patalo lan di Lampio
10. Paliuh, Pagonggang lan di Batualu
11. Ne’ Lollo lan di Leatung
12. Tomarere lan di Gantaran
13. Palondongan lan di Simbuang
14. To Gandang lan di Sarapung
15. Pagunturan lan di Bebo’
16. Ne’ Tikuali lan di Ba’tan
17. To Bangkudu Tua lan di Malenong.
18. Takia’ Bassi lan di Angin-Angin.
19. Patabang Bunga’ lan di Tadongkon.
20. Salle Karurung lan di Paniki
21. Kattu lan di Buntao’
22. Palinggi lan di :La’bo’.
23. Sa’bu Lompo lan di Bonoran
24. Ne’ Birade lan di Tonga
25. Patasik lan di Pao.
26. Ne’ Malo’ lan di Tondon
27. Poppata’ lan di Nanggala.
28. Patora Langi’ lan di Langi’
29. Ne’ Patana’ lan di Kanuruan.
30. Ne’ Banne Langi’ lan di Kadundung.
31. Tibak Langi’ lan di Saloso.
32. Ne’ Kalelean lan di Sarira.
33. Banggai lan di Salu.
34. Songgi Patalo lan di Lemo.
35. Arring lan di Mendetek.
36. Lunte’ lan di Mareali
37. Rere lan di Lion
38. Baan Langi’ lan di Lapandan
39. Saarongre lam di Tondok Iring
40. Marimbun lan di Bungin
41. Panggeso lan di Tiromanda’.
42. Sando Pasiu’ lan di Pasang.
43. Tolanda’ lan di Santung.
44. Bangke Barani lan di Manggau
45. Parondonan lan di Ariang.
46. Sundallak lan di Burake.
47. Panggalo lan di Lemo
48. Bara’padang lan di Gandang Batu
49. Pong Arruan lan di Sillanan
50. Pong Dian lan di Tinoring
51. Pong barani lan di Marinding
52. Tobo’ (digelari juga Tali Mariri) lan di Tampo (Tanduk Bulaan)
53. Pong Turo lan di Baturondon
54. Puang Balu lan di Tangti
55. Kulukulu Langi’ lan di Palipu’
56. Pula’ lan di Tengan
57. Saranga’ lan di Lemo
58. Tanduk Pirri’ lan di Ala’
59. Pokkodo lan di Tagari
60. Kundu Bulaan (Mendila) lan di Sa’dan
61. Pangarungan lan di Tallung Lipu
62. Taruk Allo lan di Tallung Lipu
63. Tengkoasik lan di Barana’
64. Ne’ Rose’ lan di Sangbua
65. Lotong Tara lan di Bori’
66. Allopaa lan di Kayurame.
67. Rongre Langi’ lan di Riu.
68. Tangke Datu lan di Buntu Tondok
69. To Langi’ lan di Pongsake
70. Mendilakila’ lan di Rongkong.
71. Ne’ Darre’ lan di Makiki
72. Ne’ Mese’ lan di Baruppu’.
73. Sarungu’ lan di Pangala’.
74. Bonggai Napo lan di Napo
75. Usuk Sangbamban lan di To’tallang
76. Ambe’ Bendo’ lan di Awan
77. Ledong lan di Bittuang
78. Patikkan lan di Bambalu.
79. Gandang Langi’ lan di Mamasa
80. Ne’ Darre’ lan di Manipi.
81. Pong Rammang lan di Malimbong
82. Tandiri Lambun lan di Tapparan.
83. Batotoi Langi’ lan di Malimbong.
84. Pakumpang lan di Buntao’
85. Tandirerung lan di Ulusalu.
86. Pong Manapa’ lan di Se’seng.
87. Tokondo lan di Buakayu.
88. Mangi’ lan di Rumandan-Rano.
89. Mangapa’ lan di Mappa’.
90. Pappang lan di Palesan.
91. Batara Bau lan di Bau’.
92. Pong Bakkula’ lan di Redak.
93. Tangdierong lan di Baroko (Enrekang).
94. Bonggai Rano lan di Balepe’.
95. To Layuk lan di Simbuang.
96. Patitingan lan di Taleon.
97. Toisanga lan di Tanete (Rano).
98. Sodang lan di Ratte-Buakayu.
99. Lappatau lan di Tombang-Mappa’
100. To Ri Somba lan di Garappa’-Mappa’.
101. Sege’ lan di Bassean (Enrekang)
102. Mangopo lan di Sima – Simbuang.
103. Ponnipadang lan di Makkodo-Simbuang.
104. Balluku’ lan di Batu Tandung – Mamasa.
105. Masanga lan di Pana’ – Mamasa.
106. Marrang Bulaan la di Mala’bo – Mamasa.
107. Sanggalangi lan di Pantilang
108. Parassean lan di Karre.
109. Tali Barani lan di Bokin
110. Pong Sussang lan di Ke’pe’- Ranteballa.
111. Emba Bulaan lan di Sikapa-Ranteballa
112. Arrang Bulawanna lan di lemo – Ranteballa.
113. To Ipajaoan lan di Kande Api – Ranteballa.
114. Puang ri Renge lan di Tabang – Ranteballa.
115. Bakokang lan di Lantio – Ranteballa.
116. To Layuk lan di Baroko – Duri.
117. To Kalu’ lan di Endekan.
118. Pakabantunna lan di Sesean.
119. Ne’ Bulu Tedong lan di Pangala’.
120. Ne’ Tulla’ lan di Ke’pe’
121. Pong Padondan lan di Tikala
122. Bangkelekila’ lan di Akung.
(rangnganni rokko ke denni disala dandan)

Pada rampomi tama padang di Sarira,
pada umpokadami tindo bonginna,
pada ussalumi mamma’ karoenna.

Misa’ tindo napotindo,
misa’ mamma’ na pomama’.

Digantinnamo To Pada Tindo,
digente’mi to sitinti pangimpi.

La dimaparongkami kombong kalua’ illan padang di Sarira,
la dipammakmi tumimbu malambe’ illan Pata’padang.

Dilando lalanni mi bainna Pong Manapa’ lako Se’seng
dilangka pa’taunan mi bonde’na Datu Muane lan di Ledo,
disanga pokki diganti mendelo-delo.

Diosokmi batu titanan tallu,
di patunnangmi tarongko tirundu lalikan.

Dipa’to’mi panampo to Lambun,
dipatunannangmi pa’kombong to Padangiring,

dipandanmi langan,
dibato’mi karumpengan ao’;
disembangmi bane’ situang bombang sumomba mata allo
diti’pa’mi lako situang daun sumomba lu rekke.

Napoballaran ampa’ pokki’ lan padang di Sarira,
naporantean tuyu mendelo-delo lan Pata’padang.

Dipabendanmi Banggai lan mai Salu ussuru’ kanan kairinna pokki’,
tuladanmi to dipodatu muane lan mai Garatuan ussara’ka’ tingayo boko’na mendelo-delo.

Bendanmi Patangbunga’ lan mai Tadongkon unnumbu’ pasoan bangi’,
tulangdanmi to dipodatu muane umparra pangulu makati’;

bendanmi Pong Songgoi Limbu ma’timpolak maa’,
tulangda’mi Pong Kalua’ lan mai Randan Batu unnambe’ pesangle lebani’,

bendanmi Ne’ Tikuali lan mai padang Ba’tan unnindo’ kapuran pangan,
tulangda’mi to dipodatu muane unnambe’ pelambaran bolu.

Ditobokmi makairinna pokki’,
disumbelimi tang mabekona mendelo-delo.

Ditimbakmi pa’dunna pokki’ dadi batu,
dikillangmi pai’na mendelo-delo kombong buku padang.

Randukmi dipopentoean manda’ la untulak Buntunna Bone,
tipamulami dipopennanti matoto’ la ullangda’ to Sendana Bonga .

Diindo’mi basse kasalle,
diambe’mi panda dipamaoson,
disanga:”BASSE DIPAMATUA LANGI’ PANDA DIPAMATUA TANA”.

Kalebu tallangmi kombong kalua’ lan padang di Sarira,
membuloala’mi tumimbu malambe’ lan Pata’padang
kumua:
”MISA’ KADA DIPOTUO,
PANTAN KADA DIPOMATE,
ROKKO MI TANG MARATOI BOMBONG,
DIONG MI TANG TU’PE DAUNNA”.

Apa denki’ manii ma’dua takin,
dengki manii masselle’ patomali

la untengkai kalo’i te basse kasalle,
la ullenda pasale umai te panda dipamaroson;
la dipamamma’ rokko lambananna Ambe’na Bu’tu Bulaan to tang makapanikuan.”

Randukmi dipabendan dama’ lan padang do Sesean
dipatulangdanmi lan padang di Sado’ko’,
dipatunannangmi lan padang di Gasing;

dipamillikmi mata to buta
anna di e’te’ lima to sekong.

Dirambi bombonganmi Aru Pute sola sambo Boko’na,
dipatu’pe daunnami Ma’ria Manda’ sola rinding tingayona.

Ka’tumi angin di pudukna Aru Pute sola sambo boko’na,
tepokmi passararonganna Ra’ria Manda’ sola rinding tingayona.

Lumokkon mi lalanna sesana bala’kayan raa’ langan padang di Bone,
tumetemi pa’gulinganna ra’dakna lempan pa’ealian langan to Sendana Bongan tallupi palo-palo.

Randukmi tang sisele’ Lepongan Bulan anna to Sendana Bonga,
tipamulami sisaranga’ Matari’ Allo anna padang di Bone.

Tontongmi sitanda eali
masae lako sitanda musu.

Apa kaluangan ia batu ba’tengna Kadere’ illan di Duri,
apa masinggung ia pasiruan Amang lan di Rumadan.

Umpokole kombami batang dikalena langan padang di Bone,
umpobembang parayoanmi tondon di batangna tama Lepongan Bulan.

Umpatuka’ pa’inaan la undasi’ pokana pindan,
umpasolo’ pa’ba’tengan la umpasilasuk la’tona komba bulaan.

Umpatiangka’mi bate lentekna to dipolondongna kada lan mai padang di Bone,
umpatirimba dukami passoeanna to di pomanuk muanena peumpuran pau-pau lan mai Lepongan Bulan.

Pada rampomi lan padang di Malua’,
diosokmi tumimbu malambe’ illan padang di Rumedan.

Kalebu tallangmi Kombongan Kalua’ la mamma’ rokko pindan tang damma’,
Membulo ala’mi tumimbu malambe’ la tibambang rokko gori-gori tang beluakan.

La sule sangkutu’ banne,
la tibalik sang buke amboran.

Dipamarongkami Kombongan Kalua’ illan padang di Bambapuang,
dipamamakmi tumimbu malambe’ illan pintu deata.

Ditananmi basse kasalle,
disusukmi panda dipamaroson;
ditanan dipamatua langi’ malolangan.

Ditananmi basse kasalle.
Diosokmi panda dipamaroson disanga: ”
BASSE SANGLENTENAN TALLO’,
PANDA SANGSORONGAN PINDAN”.

Bendanmi Ne’ Tikuali lan mai Ba’tan unnindo’ basse kasalle,
tulangdanmi to dipodatu muane unnambe’ panda dipamaroson.

La ditanda tasik mi pindan tang damma’ Buntunna Bone anna Lepongan Bulan;
la ditoding minangai mi gori-gori tang beluakan to Sendana Bonga anna Matari’ Allo.

Diraukmi sokko sangbali unnindo’ basse kasalle, dikua:
”IA NADEN UNTENGKAI KALO’ BASSE KASALLE,
IA NADEN ULLENDA PASALA UMA PANDA DIPAMAROSON ,
LA NATEMME’ TANDUK SOKKO ROKKO LA’TANA PADANG
LA NASEROK TANDUK TARANGGA LAKO MATALLO MATAMPU”.

Ditutungmi bangkaan pu’pu’ lan tangana tondok ke den ullenda pasala uma panda dipamoroson
Dirodo susu baine dikua:
”Anna tang memmimi’ ke den untengkai kalo’ basse kasalle,
ke den ullenda pasala uma panda di pamaroson”.

Ditundanmi basse dipaturun guntu’
diruyanganmi panda dipamaroson.

Disusukmi buku rapona Pakila’ Allo,
ditananmi bamban tang mabekona Ambe’na Bu’tu Bulaan, dikua:
”Ia naden ussandak salu basse kasalle,
ia naden ussobu mata kalambanan panda dipamaroson
la umpolalan lalanna Pakila’ Allo to pasisurung lindo alukna,
la umpolambanan lambananna Ambe’na Bu’tu Bulaan
to tang meka-sangka’ to tang meka-panikuan”.

Dipopa’indo’mi basse kasalle langan Bone,
dipopa’ambe’mi panda dipamaroson tama Lepongan Bulan.

Dilenten tallo’ langan Bone tang tumba tiapa,
disorong pindan tama Lepoangan Bulan tang ramban tang beluakan.

Tontongmi dianna batu silambi’ masae lako
Nenne’mi disedan karangan siratuan.

.. copas: Marsel D. Lembang
tongkonan kada panito bisara
(Tabe' lako mimi' kandaurena to situang tanduk Ne' Lumbaa, siman lako lolosu manikna to sitonda sulangka dao mai Riu, Torea. Angku pa langnganni tongkonan kada inde kada disedan sarong, angku parekkei panito bisara inde bisara di toke' tambane baka)Tasirere’-rere’ lendong
Tasi’pa’tallu masapi
Tasiimpa’ bale rante

Lendu’ tamamoko bassi
Kumande lannako liu
Ma’kasolang-solanganko

Tikalulunmoko bassi
Tilu’pi’moko mataran
Patondon patomaliko==============
Daomo’ tangkena gandang
mengurapakna tandilo
do ma’tondon penainna
Tondok boro toda dao
banua mapia toda
boro pangrantean toda
Kari’ la sa’timo dao
kari’ tang la sule lemmo
tang la balik bulo lemmo
Napopedampi to tumbang
napotamba’ to malangi’
burra to kandeatan
==============
Nasule kale datunna
to kuli’ ampu lembangna
urruru tampa dolona
sola to simbulayanna
Anna burinti tumende
anna langkan boro tia’
==============
Sulemo’ mendio’ gandang
membollo-bollo tandilo
melangi’ri suling bulo
Ta’pa passakkemo gandang
bua uranmo tandilo
Napopedampi to tumbang
napotamba’ to malangi’
burra to kandeatan
==============
Sumonglo’ ma’ tanduk bassi
ma’ongka-ongka mataran
ma’patondon oda-oda
Oda-oda talaomo
sudidi tatiangka’mo
sumonglo’ rokkoko moko
Laoko sambalin mai
bu’tu lamban diong mai
Tibaen-baen kutiro
tipailang kusaile
sundallak kutiro lako
Make pabu’tumi mai
make popentolinomi
make baen-baenanmi
La nakita mamma’ku
nakadang tindo bongingku
sola mamma’ karuenku
Sumonglo’mo to Sesean
layomo to Lindo Tayu
==============
Ke den to makuyu manuk
sola to makuyu langkan
Mai maimoko inde’
Dipopedampi rara’na
dipotamba’ kaisse’na
Make pabu’tumi mai
make baen-baenanmi
Ditadoi palakunna
diben lalan inaanna
Tungkalolong diara’na
lalan inayanna Puang
Pa’poraianna Deata
Tungka lolong diara’na
Napopedampi to tumbang
napotamba’ to malangi’
inde to kandeatan

by: Marsel Dua Lembang
tongkonan kada panito bisara