1. Tibungka'mo te pangkapu'na Puang
Matua
2. tikillangmo te pandaruma'na To
Kaubanan.
3. Pada tibungka'mo randan dipudukku
4. pada tikillangmo tongka'na lilaku.
5. Kendekmo te allo masero pindan
6. langnganmo te kulla' mabase banaa.
7. Ma'tangnga di lalanmo te allo
marorrongan
8. ma'iring di lampoanmo te kulla'
mengkidi-kidi.
9. Iamo sulona te ba'ba kalua'
10. iamo bia'na te pentutuan lipu.
11. Iamo ia panggaraganna Puang Matua
12. tang damma' tang beluakan.
13. Malute diposulo padang
14. mabangko dipobia' dianginan.
15. Naposulo sondong torro tolino
16. napobia' dianginan to kenden tau mata.
17. Naposulo sondong rokko sumalunna
lombok
18. napobia' dianginan rokko tiempanna
rante kalua’
19. Umpopesese lolo rangka'na
20. umpobingkung randan kanukunna.
21. Umbaliangan tana lotongna ba'ba kalua'
22. umpoturu-turu lompo tikalabona
pentutuan lipu.
23. Disanga
umboko' allo matua
24. digente' ma'tengko tiranduk.
25. Undaka' rokkoan kollong
26. tumuntun tamman dibaroko.
27. Anna sirussun kande dio alla'na to
torro tolino
28. anna saba' tanan-tanananna to kenden
tau mata.
29. Sulona palisu sirenden,
30. bia'na tanduk tuo langngan.
31. Naposulo sondongmi metaruk biang
32. napobia' dianginanmi metangke luano.
33. Nakande napatobang di kollong
34. natimbu' napalamma' di baroko.
35. Anna torro sumena' lan padang kalua'
36. anna torro memba'ka' lan tandung
kalonaran.
37. La naposulo sondongmo ia bai
diparipangkung
38. la napobia' marorrongan ia doko mari'pi.
39. Apa dipamasangla' ia kande mammi'na
nene'na bai
40. dipamaindan ia timbu' marasanna to
dolo bati'na tarrone-rone.
41. Anna kasalle dadinna
42. anna lobo' kombong garaganna.
43. La naposulo sondong ia manuk torro
membuya
44. la napobia' marorrongan ia kodek
petanda masiang.
45. Iamo ia panampa rara'na Puang Matua
tang balle-balle
46. iamo ia pa'kombong bulaanna To
Kaubanan noka'pa katolinoan.
47. Manarang ia ussuka' songkang tangngana
bongi
48. pande ia umpa'kolakanni pangunaran
paseko malillin.
49. Tumanan talinga tang bimbang dao
tangkena lamba'
50. rumanduk pili' tang pingu-pingu dao
lolokna barana'.
51. Randukmi urrangi re'dena tasik
52. tipamulami umpetialling mongngo'na
banaa.
53. Parannu paiman tontong la sende inaa
54. belanna umpegarente tiallingmo
sangserekanna
55. tama
ba'tangna langi'.
56. Umpelale' gumarentena sang pa'duananna
57. tama masuanggana to palullungan.
58. Belanna manarang ia Puang Matua ulu
59. untoke'-tokeranni manukna Lapandek.
60. Pande ia To Kaubanan umbato'-batoranni
61. saunganna Pong Bulupala'.
62. Tontongmi ditiro tuka' lan tangngana
langi'
63. kelaunnambo'ki' banne mellao langi’.
64. Nenne'mi disondong pentiro lan
pangunaran paseko
65. malillin ke la sumio'ki' ka'do turun
masuanggana.
66. La naposulo sondongmo buriko' matua
manglaa tondok
67. la napobia' dianginanmi bare' polo
bamban
68. tontong dipotandilo tando' bangun
umperapa'i
69. to ma'dua takin umpea'tanni to
massele' patomali,
70. anna tang kandean dena' lembang disali
sangka'
71. anna tang intokan olang-olang lipu
ditande pemali.
72. Naposulo sondongmi datu mengkamma'
73. napobia' dianginanmi ma'dika tang
sumu.
74. Apa ia malute manglaa sondong
75. mabangko manglaa dianginan
76. untaranak sang eananna, urria
sipobalo'na.
77. Makambanmi serre' didatui masirri'
manapa'mi
78. to barang dipayungi.
79. Naposulo sondongmi te kapuran pangngan
80. napobia' dianginanmi te pelamba'
baolu.
81. Apa kuballa'mo te ampa' tang sala
suka'
82. kurantemo te tuyu tang pinda ia'na.
83. Kuserekmo bolu sipatu ura'na
84. kusigi'mo kalosi ponno issinna.
85. Kutedokmo kapu' ma'rupa bumbungan
86. kuponnoi
rangki'mo situru' allo melambi'.
87. Kupalempan dikalilingmo sipasanglola
kulla'
88. kamammuran.
0 comments:
Post a Comment