BADONG
(kadong badong versi nasrani)
BADONG MA'PAKILALA
E..! Umbamira kombonganta ?
To mai sangsiuluranta ?
Sang siuluran lan olo mala'bi'na Puang?
Ke'de' komi anta ma'pakatana
lako rapunna to memboko'
tatannun pemala' maa
Langngan olona Puang
Lako te tosangkaponan ao'
lako te indo' ( Ambe' ) tobalu dikamase
Puang Perangi Pengkamoyaki
Puang tanding talingakan
angki pakendek pa'pudian
keumpokadaki' kamase
lako kami ma'rupa tau
Pudimi Puang
Pakala'bi'mi Puang
Pekalangka'i Sanganna Puang
Pangke'i Kamala'biranna
Belanna tae' sengan'na
Dipudi, dipangke' sangadinna Puang
Dana bata penaammu
sangadinna pamaringnganni tengkamu
Anta masakke mairi’,
Madariding sola nasang.
BADONG UMBATING
Tonna masaki ulunna,
Tiku ramman beluakna ;
Nenne’ samandu-mandunna,
Kerangan umbongi-bongi.
Samari tampak sarrona,
Te upu’ pekaindo’na ;
Ka’tu angin dipudukna,
Ronta’ tondon to batangna.
Sokan sokannamo ia,
Te dao nene’ kamali'ta ;
Sola kombonganna Puang
Unnamboran tinaranna.
Namboran salarika,
Nasio’ tang tongan dika ;
Dengka tau tang nabasa,
Tang nalulun baratai ?
La ditulakraka langi’,
La dimangairika ? ;
Sokan-sokan ia Nene’,
Tang ma’ga’ta’ to dolota.
Ke napapatui lenki’,
Ke nasanda simisa’ki’ ;
Sanda’-sanda' dilempangan,
Pangkun dipentilenduran.
Tallang turanannaki’ Puang,
Ao’ bela’-belaranna ;
Ke disaile sulei,
La dibandika menasan.
Inde dao to tungara,
Rintin to mennulu sau’ ;
Umpolo bintanna Sali,
Sirundu’ karasan tangnga'.
Sule langngan olona Puang
Suruga tungka sanganna
Tondok matontongan
Unnola tossoan Adang,
Panta’daran Tau bunga’ ;
Marampak ya lolo'
Kombongmi to palullungan.
La umbengki’ tua’ sanda,
Peada' sanda’ mairi’ ;
Anta masakke mairi’,
Madarinding sola nasang.
BADONG PASAKKE
Indemo kada mali'ki
Pango'tonan kamaseki
pa'pakilala penawa
la ullalanni katuoan ilan telino
ilan tondok kamasena Puang
ilan tondok to ditonno' bua kayu
Ganna' rekenan aluk
Sundunmo pemala'
Dipalulangngan Olona Puang
Nasaladan kada rapa’ ;
Anta masakke mairi’,
Madarinding sola nasang.
BADONG MA’PALAO
Tiromi tu tau tongan
Tu to natampa Puang
Tae’ sanglindo susinna,
Sanginto’ rupa-rupanna.
Pada ditampa bintoen tasak ;
Pada dikombang bunga’ lalan ;
Sanga maelo natampe
untannun ulelean masokan
siangkaran lan kamasusan
sipasuka' lan katanggannaran
Nalambi'mo attu petamba
Lasulemo langngan olona Puang
Umpellambi'i Tondok Matontongan
Suruga Tungka Sanganna
Dao Suruga lama'kombongan
La sangtondokan to malambu' Penawa
Sangisungan to menggaraganna ;
Ia nasang mintu’ tau,
Mairi’ sangtolinoan.
0 comments:
Post a Comment