to toraya

Mintu’ta naluang paya
Pandung dibekkurayai.

Te dokko te sau’ (dokko = rokko)
Te langngan te lako

Inde’-inde’ poko lako
Mareke’ ko solanasang

Anna masiang murangngi
Maleso lan talinganmu

Patanan poko talingan duammu
Palidan poko pili’ pa’perangimmu


Aka, inderi dao to mamma’ layan lempo sumanikna
To matindo dao pandung dianggilona


La kutendeng mo kinallo lalanna
La kusinggi’mo tedong tunuanna

La na pokinalloi lalan
La napobokong dilambanan

Langnga tondok to dolona tu
Isungan to tumampana

La kusinggi’ poko tedong
Laku tendengko kanae’
Tedong dio randan langi’
Kanae’ lelean uran

Ditambai anna sae
Diongli’ anna la rampo

Tonna rangimo petamba
Tonna sa’dingmo peongli’

Sikutana sangke’deran
Sikuan sangtiangkaran

Sadio-dionamai
Sauntangngana lalanna

Sokko’-sokko’ napadolo

Tarangga napari tangnga
Pampang urramba solana.

Anna sae inde tondok
Narampo inde Suppirang (nama kampung)

Indemo naluang paya
Pandung dibekkurayai

La kutendeng moko tedong
La kusinggi’ko eanan

La kusinggi’ sala rika
Kutendeng tang tongan dika

La kusinggi’ napatu singgi’na
La kutendeng napatu tendengna

Aginna tapo lu langngan
Ganna’na ta kendek lu rekke


Palisunna tende tedong, Kapu’ Bakana to merrapu tallang
Bulunna tinde tedong, Darun Bulanna to merrapu tallang
Matanna tinde tedong, Koton Bulaanna to merrapu tallang
Isinna tinde tedong, Bissa’ Balusunna to merrapu tallang
Atena tinde tedong, Sangeran Bulaanna to merrapu tallang
Kalungkungna tinde tedong, Suro Pindanna to merrapu tallang
Bulunna tinde tedong, Darun Bulaanna to merrapu tallang
Kutunna tinde tedong, Bu’buk Bulaanna to merrapu tallang
Lissena tinde tedong, Ba’tan Bulaanna to merrapu tallang
Kasongena tinde tedong, Pantu’tukan Bulanna to merrapu tallang
Guntu’na tinde tedong, Eran Alangna to merrapu tallang
Lentekna tinde tedong, Banua Gayangna to merrapu tallang
Buana tinde tedong, Gasing Bulaanna to merrapu tallang
Talingnganna tinde tedong, Piring-Piringna to merrapu tallang
Kale’ke’na tinde tedong, Ponto Lola’na to merrapu tallang
Perendenna tinde tedong, Perenden Eananna to merrapu tallang
Ikko’n tinde tedong, Kandaure Salombe’na to merrapu tallang
Tambukna tinde tedong, Perurre Manikna to merrapu tallang
Usukna tide tedong, La’bo’ Pinainna to merrapu tallang
Rarana tinde tedong, Kasedana to merrapu tallang
Penaanna tinde tedong, Kalimbuang Bobana to merrapu tallang
Duku’na tinde tedong, Barra’ Masukaranna to merrapu tallang
Tumabangna tinde tedong, Sepu’ Sulangna to merrapu tallang
Balulangna tinde tedong, Maa’ Maelona to merrapu tallang

Upu’mo tendengna tedong
Lolloanna tinde eanan

Anna kendek allo kendek kasugiranna to merrapu tallang
anna langngan bulan langngan parayanna to ma’kaponan ao’

Anna sa langngan-langnganna
Anna sa kendek-kendekna

Anna kendek mendaun sugi’
Anna langngan menta’bi eanan

Anta masakke mairi’
Marudinding solanasang