Apa malle-malle mani
tang mallena
leaga mani tang
leaganna.
Puang diosokki osokan
pentionganan
kumua tumbari ia to
dipogandang
tiapari ia to
dipobombongan
anna paliling
bontongra ia tananan ongan
lan pangrante manikna
to merrapu tallang.
Anna dandan
kalumbassikra ia pa'toran kurin
lan tadollo ata'na to
memponan ao'.
Anna diosokra ia
alangan darongko',
anna dibato'ra ia
karumpeng ao'.
Anna disembangra ia
bane' sumomba lurekke,
anna dipali'danra ia
kabombongan rara'.
Napoale mandi' bai
ma'kuli' pondan ,
napoampa' lana-lana
to bonde matua.
Anna pabendanmo ia
dukkuan api
anna patunannangmo ia
suean ma'lana-lana.
Randukmo ia
napegarente tialling
sang serekanna lako
ba'bana lembang,
napelale' gumarente
sang pa'duananna
lako pentutuan lipu.
Apa Puang Matua ri ia
lan ba'tangna langi'
la kupabunga' tongkon
la kueranni kapuran pangngan.
To Kaubanan ri ia dao
masuanggana To palullungan
la kupamatande
unnisung la kupelalanni pelamba' dibaolu.
Bungka' selengmokomi
batu rupammi Puang Matua ulu
lan to' tana rangga
bidaran doti
langi'mokomi karangan inaanmi To Kaubanan
lan to'tandung tiulu.
Ammi tontongipi inde
to merrapu tallang
la tumangke sanda
mesuru'
nenne' malaanganpi
inde to memponan ao'
kumangkan lindo
sara'ka'.
Kalemi mo Puang Matua
ulu la metamba lako Deata mamase
tondon tobatangmi mo
Puang To kaubanan
la meongli' lako
Puang sa'palabuda
ammi tundan to
mamma'pa Deata umballa' langi'
Miruyang to matindopa
Puang unne'te' to palullungan
Puang untampa to lino
unggaraga tongkon tau mata
Deata unggaraga
sukaran aluk unnindo' pemali sanda saratu', unnambe' passalinan ganna' dua riu.
Malutemo Ia undandan sangka'
untanan ma'lalan ada'.
Umposarong basse
kasalle naonganni panda dipamaro'son.
La situru'pokomi
Deata mamase
la
sipopanglalanpokomi Puang sa'pa labuda
Deata undandan
bintoen tasak umpataruk asi-asi malillin.
Deata ma're'pe
bunga', makapa londong,
lumepong bulan,
tumare' allo,
tipampang lemba',
tibato' tallu situru'
Iamo tumampa gaun,
rumende salebu',
kumombong rambu roya.
Iamo rumampa guntu',
kumalle lepa-lepa tibiang kila'
umpalosson uran di
langi'
umpate'dek tana'tak
di batara.
Iamo Deata malute
umpasitono' papa tangngana langi'
Iamo Puang mabangko
umpapa'ranni masuanggana to palullungan.
Apa karua ade'
papa'na langi'
sang pulo dua ade'
tono'-tonoranna masuanggana.
Angku kendek langngan
duanna, tallunna, a'pa'na,
limanna, annanna,
pitunna, karuanna .......
O ... iamo nanai
Puang ma'timpolok bulan
ma'te'paya bunga'
malute ma'bobong laketau
Iamo Deata patalo
tangdo ma'patongka' tadia
nenne'
ma'pasangbali-bali rokko lisu pala'na
to merrapu tallang
sola talu'tuk
tarunona to-memponan ao'.
Kukendek langngan
pengkaseranna
kulandi'i papa' sang
pulona langi'
dao sang pulo
misanna, dao sang pulo duanna
sanda ia rekenanna
Deata tangngana langi'
ganna' ia bilanganna
Puang masuanggana.
Belanna kulandi'mo
manetena langi'
kudete'mo bubunganna
batara
tonangmo' dao randan
tarun-tarunanna
disanga ma'arru'
balusunna masuanggana.
Inannamo ia Deata
tammu-tammuan
sola to Puang
rompa'-rompasan
malutemo Ia
umpopa'ponnoan sepu' to torro tolino
umpalempan
dikaropi'na to kenden tau mata.
Siria ta'dungmokomi
lan manetena langi'
sirimba kambuno
mokomi lan bubunganna batara.
Ammi sangke'deran to
Deata mamase
ammi sangtiangkaran
to Puang sa'palabuda.
Den komi manii
lumingka to belang
den komi manii
lumenne' to bantala-tala.
Pamanda' komi sape
rundunmi
potarukkomi lamba'
beluakmi.
Kolong rumbo komi
eanan sanda makamban
sompo buntangan komi
barang apa sanda ia'na
Ammi patuara'
kalisusun bulaanMi.
Apa iamo eran
misiturananni
sola bonglo'
misiosso'i
ungkolong rumbo sanda
makamban
ussompo buntangan
sanda manapa'.
Disanga tua'na tallu
lolona
digente' parayanna
a'pa' tauninna.
Polalanmokomi
tibangkona rambu
polambananmokomi
tibantukna lelatu.
Ammi mellesei litak
diong ballaran ampa'
ammi mendemme' daenan
diong lantean tuyu.
Sirau banne mokomi to
torro to lino
siboto amboranmokomi
to tongkon tau mata.
Anna tengka tedongpa
randan di pudukku torro to dipogandang,
anna te'pa karambaupa
tongka' dililaku to dipobombongan,
la te'pa karambaupa'
rokko sangkapuanganmi.
Apa tangkupomakassa'
manii mebala kollong,
tangku pomanimpa'
mani ma'kulambu penaa,
la unnia' didi tondok
maelona to pasali sangka',
la umpinde retokan
pata' kapayunganna to parande karua.
Apa piapa aku
dadingku malolle'pa aku garaganku
na akumo aku la
dipatuo lamba' lan te kapemalaran
akumo aku di palole'
barana' lan te kapangurrande-randean.
La ussumbungan randan
dipudukna to diponene'
la unnumpuran
telo-telo tongka' dililana to dipotomatua.
Apa tuo balo'ri
tutungan bia'
tumbu kumuku'ri
tetangan massulo-sulo.
Iamo la kupopentoean
manda' lapasumbungan puduk
iamo la kuponanti
matoto' la paumpuran kada-kada.
Apa karua ade'
papa'na pasali sangka'
sangpulo dua ade'
kasitodoranna to parande karua.
Apa pong Tulak
padangmo la kutundan to mamma' rokko manapi'na tana.
Pong Tandi daenanmo
la kuruyang to matindo
rokko kalopakna
pentutuan lipu.
Malute ia umpolalan
eran batunna rokko,
mabangko ia ussassang
ma'karanganna diong ma'papa morangna.
Inanna deata
mangallona rompon, puang massalempang
baraba, ma'kundai lumu', ma'lullung bura-bura.
Iamo deata dipolalan
sape rundunna tumangke suru'
dipolambanan lamba'
beluakna kumangkan lindo sara'ka'.
Angkaran mokomi
pa'panompokmi
endekanmokomi
pa'patasikmi.
Anna tua'na tallu
lolona
anna parayanna a'pa'
tauninna
la mikolong rumbo te
allo totemo
la misompo buntangan
te kulla' to marassan.
Ammi situru'pa uaka'
kasallena kalimbuang boba
ammi sipanglolapa
balimbing kalua'na sakke malino.
Ammi rubakpa
tangngana langi'
ammi sassangpa rante
kalua'.
Pebusarungngu'pokomi
tarampak banuanna to merrapu tallang
pebutantan bulemo
laa'pokomi tadollo ata'na to memponan ao'.
Ammi rampo to lembang
diong ballaran ampa'
ammi tu'tun koli-koli
diong lantean tuyu.
Apa la untundan to
mamma'pa' ia deata ponnoi padang
la urruyang to
matindopa' Puang mela'bi daenan.
Iamo deata paria
tannun keallo-kebongi
iamo Puang pasembe'
talikuran kemakale'-kekaroen.
Deata rundun allo
ma'patudu-tudu
Puang sirondong
paseko malillin nenne' ma'pakilala.
Umpakilala to torro
to lino
umpakainga' to kenden
tau mata.
Tontong umpatudu
lalanki undaka' rokkoan kollong
umpate'te mata
kalambananki' tumuntun tamman di baroko.
Iamo deata ditimba
bubunna keallo-kebongi
disio' tondon
turunanna kemakale'-kekaroen.
Iamo deata dikalette'
utan malunanna
dire'tok kayunna,
dionno' tanan-tananna.
Deata lumepong tondok
sumembe' mata kali.
Deata umballa' rante
kalua'
unne'te' tandung
kalonaran.
Deata umbori' salu
umpatilengko' randanan
urrirak liku mandalan
umpakamallu' darra'.
Deata untombon
ma'karanganna,
umpassare tuka'
kuli'na padang.
Unnampa' doti langi'
lipu sanda kalua'.
Undandan buntu madao,
unggaraga tanete melangka'
umpamakamban pangala'
tamman' umpadikki' kakayuanna.
Unggaraga ma'buntu
batunna' tumampa tondok madaona.
Laku paliling kanan
pokomi te deata mamase
laku tamben bala
tedong pokomi te puang sa'pala buda.
Laku lele buntu
batummi, laku lende' kapayungammi.
Tae' komi laku tempe'
kuboko' te deata mamase
Tae' komi laku anna
lako-lakoan te Puang sa'pala buda.
Ma'urang sumomba'
komi lan te kulla' kamammuran
Pemanukki mokomi
padang masero pindan
Pa'tidukunni mokomi
lipu mabase banaa
Limbong mokomi diong
pangrante manikna te merrapu tallang
tasik mokomi diong
pangrampa' bulaanna to memponan ao'.
Sipiak torro mokomi
sang deatammi diong ballaran ampa'
sisese unnisung
mokomi sangkapuangammi diong lantean tuyu.
Titanan tallu mokomi deata
mamase kutete manikki kapuran pangngan.
Tisamba' batu
lalikanmokomi Puang sa'pala buda kipolalan bulaanni pelamba' baolu.
Apa laku pasipiak
torro pokomi nene' manganna sangka'
laku pasisese
unnisung pokomi todolo lentenan panikuan
Apa iamo nene' kiporara
rarana torro to lino
ia mo to dolo kipo
buku bukunna to kenden tau mata.
Nene' tepo a'pa'ki,
leso karuangki, daluk sangpulo annangki, bidang tallungpulo duangki.
Nene' dio tanda
indo', nene' dio tanda ambe'.
Ma'urang sumomba'
mokomi to diponene'
Ma' kabumbu'
sidoloanmokomi to dipotomatua.
Pemanukki mokomi
padang milepong pindan
pa'tidukunnimokomi
lipu marante banaa
apa limbongmo taruk
bulaanmi tumangke suru'
tasikmo lalosu
manikmi kumangkan lindo sara'ka'.
Ma'pangngan mokomi
Puang Matua ulu,
ma'lea pudukmokomi
Puang mamase.
Pada ma' pangngan
mokomi to diponene',
pada ma' lea-lea
mokomi torro to dipotomatua.
Ammi mangka ma'
pangngan to,
ammi malia puduk,
ammi tananni talanga
tang bimbang,
rumanduk pili' tang
pingu-pingu.
Ammi tananni talinga
te kapemalaran,
ammi palidanni
pa'perangngimmi te kapa'urrande-randean.
Apa umpalimbongkanni
ma'lolo tau
apa umpatasikkanni
semberan lotong ulu.
La umpalimbong kanni
takinan bunu'
la umpatasikkanni
ponnoan alang.
La umpalimbongkanni
rendenan tedong,
laumpatasikkan
umpuran komba kale'ke
sola eanan sanda
makamban,
sola barang apa sanda
ia'na.
Apa iamo pemala'
natanan tallang to diponene',
iamo pemala' naranduk
bulo ala' to dipotomatua.
Dianna batu silambi'
dio mai Pong mula tau.
Disedan karangan
siratuan diomai pong tumbo to lino.
Tontong diallonni
tang ma'pele mamma'
ditulangdanni tang
malilu tindo
tontong disiosso'i
nenne' disiturananni.
0 comments:
Post a Comment